Regesten der Landgrafen von Hessen

Erweiterte Suche »
Ergebnismenge »
Treffer 65 von 94

1451 April 14

Schiedsspruch im Streit zwischen Würzburg, Henneberg und den von Hune

Regest-Nr. 9237

Überlieferung

Drucke:	Hennebergisches UB 7, S. 269-271 Nr. 319.

Regest

Hersfeld. - Landgraf Ludwig zu Hessen vollzieht durch einen Schiedsspruch die Beilegung der Fehde zwischen dem Bischof Gottfried zu Würzburg und den Grafen von Henneberg (Schleusingen und Römhild) einerseits und den Brüdern und Vettern Gise, Heinrich, Jorg und Wilhelm von Hune andererseits.

Originaltext

Wir Ludewig, von gotis gnaden lantgraue zcü Hessen, Bekennen vnd thun kunt mit diesem vffenen brieffe allen luten, die en ansehin, horen adir lesen vmb soliche schede, gebrechin vnd vnwillen, so dan gewest vnd vfferstanden sin zcüschen dem Erwirdigen jn gott Vatter hern Godefride Bischoffe zcu Wirtzpurg, auch den Edeln vnd walgebornen herren Wilhelm vnd sinen Brudern vnd Jorgen, gefettern, Grauen vnd herren zu Hennenberg, vnseren lieben herren oheimen vnd frunden vff eyne, Gisen, Heinrichen, Jorgen vnd Wilhelm, gebrudern vnd gefettern von Hune genant vff die andere syten, als von sachen antreffen das Slos Hune, Das wir nü vff hute datum diesis brieffs zcüschen den egenanten herren von Wirtzpurg vnd von Hennenberg vnd den vorgenanten von Hune mit hulffe vnd biewesen des Erwirdigen jn gott vatters hern Conraden, Abtis zu Hersfelde, vnsers lieben herren vnd frundis, vnd etzlichir ander mehir vnser trefflichen Rete vnd frunde zcüschen den genanten parthien in gutlichkeid vnd mit jrer aller wille vnd wissen bered vnd betheidingit han, inmassen dan hernach geschreben stehit.
Zcum ersten vmb die gebrechen von des Slossis Hune vnd siner zübehorunge wegen, darumb ist beteidinget, daz alle schulde vnd züsprache, was die genanten herren von Wirtzpurg vnd von Hennenberg zü den egenanten von Hune vnd die von Hune widderumb zü den herren von Wirtzpurg vnd von Hennenberg von Hune wegen bisz vff diese zyt gehabt han, genczlich vnd zumale bie vnd abe sin jre keyne parthie die andern darumb forter nicht anlangen vnd sonderlich auch die herren von Wirtzpurg vnd von Hennenberg die von Hune an dem Slosse Hune vnd siner zübehorunge nu forter nicht hindern noch drangen soln ane alle geuerde vnd darumb so soln auch die egenanten Gyse, Heinrich, Jorge vnd Wilhelm von Hune die obgenanten herren von Wirtzpurg vnd von Hennenberg, jre lande, lute vnd die jren vngeuerlich virloben vnd virsweren zcwenczig jar, dieselben zcwenczig jare vff hute datum diesis brieffs angehin vnd nehst nach eynander folgen soln, die zcyt widder die egenanten herren vnd die jren vngeuerlich nicht zü thunde vnd auch nicht gestaden, daz die egenanten herren vnd die jren von dem slosse Hune von adir zu dem teyle, daz den vorgenanten von Hune züstehit, beschedigit sullen werden alles ane geuerde. Doch hetten adir gewonnen die vorgeuanten von Hune bynnen zcyt der orfhede zü der vorgenanten herren von Wirczpurg vnd von Hennenberg Mannen, dieneren adir vndersassen, der die herren vngeuerlich mechtig weren, eynche schulde vnd züsprache, so soln derselbe here, vndir dem der, dem die von Hune also züzüsprechen hetten adir gewonnen, den von Hune auch rechtlich helffen bynnen den nehsten zcwen Mahinden nehst darnach, so sie des von den von Hune gemaned werden, es enwere dan, abe sich daz durch daz recht worde virlengen vngeuerlich, vnd abe dan den von Hune des rechten bynnen solichir zcyt nicht gehulffen muchte werden vngeuerlich, so mugen sie dan dieselben, mit den sie also zü thunde hetten adir gewonnen, anlangen vnd fordernn, damitde sie auch alsdann jre orfhede nicht vorbrochin sulten haben auch ane alle geuerde. Wer es abir, daz die egenanten von Hune zü der egenanten herren von Wirtzpurg vnd von Hennenberg eyme addir mer adir der herren eyner adir mer zü den von Hune nü forder schulde adir züsprache gewonnen, solichis soln sie auch vnder eynander geborlichen vsztragen allis ane geuerde. Item vmb die lehin, die Gyse von Hune von Graffen Wilhelm vnd sinen Brudern von Hennenberg meyned zu haben, darumb ist beteidinget, daz Gyse vnserm oheimen Grauen Wilhelm von Hennenbergk vnd sinen Brudern darum auch beteidingen mag, so soln derselbe Graue Wilhelm vnd sine Brudere Gysen von Hune darumb geborlichis vsztragis nicht weigeren vnd was sich dan in dem vsztrage erfindet Gyse von Hune von vnseren oheimen von Henneberg habe nsulte in rechte, damitde sulten sie en auch belehin ane alle geuerde. Vnd vmb Philips von Hune, den vnsere oheimen Graffe Wilhelm vnd sine Brudere von Hennenberg zcü Slusungen gefangen siczende han, darumb ist auch sonderlich beteidinget, daz derselbe Graue Wilhelm vnd sine Brudere den egenanten Philips solichis sines gefengnissis tag geben soln eyn jar nehstfolgen(d) nach gifft diesis briffs zu virsuchen, abe Philips vnd sine frunde sich mit vnserm Oheimen von Hennenberg vmb solich gefengnisse muchten virtragen vnd abe sie des also bynnen dem jare nicht finden konden, so sulten die genanten vnsere oheimen von Hennenberg Philips von Hune siner dag abir eyn jar virlengen vnd daz dan also alle jar gein Philips mit virlengunge sines tagis haben so lange, bisz er des mit vnsern oheimen von Hennenberg zu ende vnd frede komen ist vnd sonderlich sal auch Philips alle jar sin gefengnisse gein Smalkalden halden, sinen dag dan holen vnd sich gein vnsere oheime von Hennenberg halten, als eyme gefangen geborlich zü thunde vnd zü halten ist, vnd abe er des so nicht hede, so muchen die obgenanten vnsere oheimen von Hennenberg en solichis gefengnisses haben zü manen gein Smalkalden adir in andere jre Slosse ane geuerde. Es soln auch die von Hune egenante die Higken widderumb zü jrem gute komen lassen vnd jn das widder geben allis sondern geuerde vnd ane arglist. Heruff soln auch alle schede, zcweitracht vnd vnwillen, was sich der zuschen diesen egenanten parthien, jren landen, luten, helffern, helffershelffern den jren vnd allen denjhennen, die darunder virdacht vnd gewand sin, genczlich vnd zümale bie vnd abe vnd hiemitde gutlich vnd fruntlich gesuned, gescheiden vnd auch alle gefangen, was sie der von allen syten gefangen han, vff eyne alde orfhede vnd dartzü auch alle dingezcal, brantschaczunge, schaczunge vnd vnbeczald geld, was des bisz vff diese zyt nicht vszgegeben vnd beczald ist, ledig vnd lois sin vnd jre keyne parthie die andern darpoben anlangen, fordern nach bedrangen in keyne wise, alle argliste vnd geuerde herjnn gancz vnd zumale uszgescheiden.
Vnd des zü orkunde han wir egenanter lantgraffe Ludewig vnser Secrets jngesigel an diesen brieff thun hencken. Vnd wir von gotis gnaden Godefrid, Bischoff zu Wirtzpurg vor vus, Wilhelm vnd Jorge, Graff vnd herren zü Hennenberg vor vns vnd vnsere Brudere vnd fettern vnd wir Gyse, Heinrich, Wilhelm vnd Jorge von Hune vor vns Bekennen alle semptlich vnd besondern, daz diese gutliche teidinge vnd bereddunge mit vnser aller wissen vnd willen fulvord vnd zü thun gescheen vnd fullendit ist, daz auch gewilliget vnd zcugelassen han, willigen, furworten vnd zülassen daz also geinwurtiglich in vnd mit crafft diesis brieffs vnd soln vnd woln, daz auch alle, wie dan vorgeschriben stehit, stede, veste vnd vnvirbrochlich halten vnd dawitder nicht thun mit worten addir wercken geistlich adir wertlich, heimlich adir offinbare in keyne wies allis sondern geuerde vnd ane arglist. Vnd des zcü fortemer bekenntnisse so han ich Jorge, Graffe vnd herre zcü Hennenberg egenant myn jngesigel vor die egenanten mynen herren von Wirtzpurg, die vorgenanten mane fettern, Grauen von Hennenberg, vnd vor mich an diesen briff gehangen, des wir Godefrid, Bischoff zu Wirtzpurg, Wilhelm vnd vnsere Brudere, Graffen vnd herren zu Hennenberg auch so bekennen vnd des vorgenanten Grauen Jorgen jngesigel vns heranne auch mitde gebruchen. So han ich Gyse von Hune myn eigen jngesigel vor mich herane gehangen. Vnd wir Heinrich, Jorge vnd Wilhelm von Hune han gebeten den vesten Symann von Merlaw vnd Lotczen von Drubenbach, daz sie jre jngesigel vor vns gebresten der vnseren heranne auch gehangen han, des wir iczt genante Symann von Merlaw vnd Loccze von Drubenbach auch also bekennen vnd vnsere jngesigel von der vorgenanten von Hune bete wegen an diesen brieff gehangen han, der gegeben ist zü Hersfelde vff Mittwochen vor dem heilgen Palmen dage sub anno domini Millesimo quadringentesimo quinquagesimo primo.

Sprache des Originaltextes

deutsch

Nachweise

Textgrundlage

Stückangaben, Regest

Hennebergisches UB 7

Original

Hennebergisches UB 7

Zitierweise

Landgrafen-Regesten online Nr. 9237 <https://www.lagis-hessen.de/de/subjects/idrec/sn/lgr/id/9237> (Stand: 29.04.2024)