Regesten der Landgrafen von Hessen
1445 Juli 25
Graf Heinrich von Henneberg verzichtet auf die Herrschaft Henneberg
Regest-Nr. 9178
- Überlieferung
-
Drucke: Hennebergisches UB 7, S. 178 f. Nr. 220. - Regest
- Graf Heinrich zu Henneberg verzichtet auf die Herrschaft Henneberg und nimmt zu Zeugen seines Verzichts den Grafen Georg von Henneberg und die Äbte zu Breitungen und Vessra.
- Originaltext
- Wir Heinrich, von gotsgnaden Graue von Hennenberg, Bekennen an defim brief fur vns vnd ale vnsere erbin vnd nachkomen vnd thun kund gein allermenglich, als wir mit den wolgebornen Wilhelmen, Johansen vnd Bertolde, vnserm liebin vettern, jn gespenne vnd czweytracht gewest sind vmb die gancze herschaft zcu Hennenberg mit yrer zcugehorünge vnd wir beyde teil solchir czweytracht vnd gespenne gegangen sind an die hochgebornen fürsten hern Frideriche vnd hern Wilhelm gebrudere, herczogen zcü Sachszin, lantgraue jn Doringen vnd Marcgrauen zcü Missen, hern Albrecht marcgrauen zcü Brandenborg vnd Borcgrauen zcü Noremberg, vnd hern Ludewisgen, lantgrauen zcü Hessen vnd an sie gestalt habin, wie sie vns darvmme entscheiden, daz wir daz zcu beyden teiln haldin sollen, die vns nü also entscheidin vnd vnser iglichem teil dez eyne versegilte schrift gegebin habin, die da klerlich jnheldit, waz vns die obgenanten vnsere vettern von Hennenberg vor eynen bescheid gebin, daruff wir vns alsdann der herschaft zcu Hennenberg vorczihen vnd jn daran abtretin sollen. Also habin vns die egenanten vnsere vettern von Hennenberg vmb solchin vnsern bescheid, nach dem der obgenanten fursten scheidebrief dauon jnheldit, genuge gethan. Hirymb so habin wir vns vorczihen vnd vorczihen vns jn craft dieses brieffes fur vns, alle vnsere erbin vnd nachkomen vnsers teyls, den wir gehabt habin ader von Erbschaft vnd rechts wegen haben sullen an der obgenantin herschaft mit jr zcugehorünge, nichts dauon usgenomen, also daz wir, vnser erbin vnd nachkomen ader nymand von vnser wegin nach solchir herschafft mit jr zcugehorunge vnd auch keynen andern vnsern vetterlichin ader muterlichin erbeteil farnder ader leginder habe, wie daz nahmen had, nach anfellen, die zcu derselbin herschaft gesterbin vnd gefallen mechten, nymmermehir keyn ansprache nach forderunge gehabin nach gethün sullen jn keynerley wise, wie daz ymand jrdengkin mechte, usgescheidin, ab die obgenantin vnsere vettern ane liebeserbin abegingen, daz got behüt, solchs anefalles sullen wir vnuorczihen sein. Wir habin auch diesin obgeschrebin vorcziheg gethan vnd thun den jncraft dieszes brieffs jn der bestin forme vnd masz, so daz ymmer craft gehabin mag ader sol vnd ussern vnd begebin vns an desim briefe aller recht geistlich vnd wertlich, wie man die finden mechte, die vns, vnsern erbin vnd nachkomen ader jemand von vnser wegin zcu nütze ader zcu fromen gesien mechten.
Des zcu rechtir vrkunde vnd vestir sichirheit so habin wir vnser eigen jngesigel an desin brief gehangen vnd des zcu geczugnisse gebetin den wolgebornen Jorgen, grauen vnd hern zcü Hennenberg, vnsern liebin vettern, vnd die erwirdigen hern Johansen, apt zcü Breytungen, vnd hern Berlt, apt zzcu Vesser, daz sie jr ingesigel auch an desin brief han gehangen, dez wir iczund also bekennen vnd darby gewest sein, gesehin vnde gehort habin, daz solch vorczigk vnd dieser brief von dem genanten grauen Heinriche bedechtlich vnd williclich getan vnd ubergebin vnd vnser jngesigel hiran dez zcu geczugnisse gehangen haben, doch vns ane schadin. Gebin nach gots geburte vierczehinhundert jar darnach jn deme funfundvierczigestin jare am sontag Jacobi apostoli. -
Sprache des Originaltextes
deutsch
- Nachweise
-
Weitere Personen
Henneberg-Schleusingen, Grafen, Heinrich, Sohn Wilhelms I. · Henneberg-Aschach, Grafen, Georg · Henneberg-Schleusingen, Grafen, Wilhelm III. · Fulda, Fürstäbte, Johann II. Graf von Henneberg-Schleusingen · Bamberg, Pröpste, Berthold von Henneberg · Sachsen, Kurfürsten, Friedrich II. der Sanftmütige · Thüringen, Landgrafen, Wilhelm II. der Tapfere · Brandenburg, Kurfürsten, Albrecht III. Achilles · Hessen, Landgrafen, Ludwig I. · Breitungen, Äbte, Johann · Vessra, Äbte, Berlt
-
Weitere Orte
Henneberg, Herrschaft · Breitungen, Äbte · Vessra, Äbte · Sachsen, Herzöge · Thüringen, Landgrafen · Meißen, Markgrafen · Brandenburg, Markgrafen · Nürnberg, Burggrafen
-
Sachbegriffe
Grafen · Herrschaften · Erbe, Verzicht auf · Zeugen · Äbte · Erbschaftsstreitigkeiten · Streitigkeiten, Vermitteln in · Herzöge · Markgrafen · Burggrafen · Schiedsrichter · Urkunden · Erbe, väterliches · Erbe, mütterliches · Fahrhabe · Güter, fahrende · Güter, liegende · Leibeserben · Gerichte, geistliche
- Textgrundlage
-
Stückangaben, Regest
Hennebergisches UB 7
-
Original
Hennebergisches UB 7
- Zitierweise
- Landgrafen-Regesten online Nr. 9178 <https://www.lagis-hessen.de/de/subjects/idrec/sn/lgr/id/9178> (Stand: 03.05.2024)