Regesten der Landgrafen von Hessen

Erweiterte Suche »
Ergebnismenge »
Treffer 37 von 407

1370-1375

Beschwerden des Deutschen Ordens in Marburg gegen die Stadt

Regest-Nr. 11654

Überlieferung

Ausfertigung:	Staatsarchiv Marburg. Papier, Rotulus 118 cm lang, 21 cm breit.
Drucke:	Wyss, UB Deutscher Orden 3#wyss18993
Regesten:	Wyss, Urkundenbuch der Deutschordens-Ballei 3, Neudruck, S. 92 Nr. 1101.

Regest

Beschwerden des Deutschen Hauses bei Marburg gegen die Stadt Marburg.

Originaltext

Dyt sint dy schuldygu^enge und ansprache .... wir Johan ........ comthur und dy brodere gemeynlich dez Dutzin husis by^ e Marpurg zu^e hon zu sprechen den burgermeystern, den scheffin und der stad gemeynlich vorgenant, als her nach geschriebin ist.
(1.) Item zum erstin sprechin wir en zu, daz sy uns unser tar und unser czun an unser molin uffe dem Grynde abe hant gehouwin, also daz sy uns dor umme noch nye rechtlich han betedinget.
(2.) Item schuldygen wir sy, daz von yr anwysunge unser herre von Monster uns nam unsern bygin gelegin gein dem Klyngelborne und daz sy und den vorbehaldin hant bys her, den uns unser gnedyge herre hat widdir gegebin und yn gescriebin und intpodin hat, daz sy^e uns den lazin volgin, dez sy nit in du^ent, und drangin uns also, alz er unser recht alt eygin ist.
(3.) Item sprechin wir en zu, daz sy uns unser eynse in der stad zu Marpurg und da vore, da wir ouch eynse han, virbodin hant und virsperret, dy uns bys her allewege wole gentzlich gegebin und gereichit sind.
(4.) Item schuldygin wir sy, daz sy uns unsern herren von Monstere, dem god gnade, der unser gnedyger herre waz, unsern ungnedygin herren machtin, dor umme he uns und unserm huse abe man sybinhundert guldin und nam uns ouch den wird by der Elwyns molin, den schadin wir y^ern thalbin gnomen han.
(5.) Item sprechin wir en zu^e, dez jarez du dy Kettzerbach flu^edyg waz, da vore hattin sy holtz gefuret uff den plan in der Ketzerbach, daz da bleyb lyginde, und my^est, der da waz zu houffen gemachit, bys daz ez daz wazzir man und fu^erte daz vor unser flu^etlochir, dy da mydde geschu^etzet wurdin, daz das wazzir lieff zu sime rechtin gange in unsern hoff und keller und inhu^eser, daz uns daz schatte tusint pund und dor ubir, den schadin wir er und ern namen.
(6.) Item schuldygen wir sy, daz uns der obegnant schade zu zweyn malin von yn widdir farin.
(7.) Item sprechin wir en zu, daz sy uns virbuwet hant von der portin zu Bulchinsteyn bys an dy molin an dem Grynde uff unsern rechtin wazzirgrane uff dy molen mit husen und andern buwin, daz uns ouch vore berechtet ist, daz mans abe solde tu^en und dez nyd in ist geschehin.
(8.) Item schuldygin wir sy^e umme den Kemphwasin, den sy machin zu eyner gemeynweyde unser rechtlich eygin ist, und uns den lange ziit intwerit han widdir recht.
(9.) Item sprechin wir en zu, daz sy in unsern fryenhoff gegangin sin und unsern bygeseßin yr tore frevelich gestoßin hant und sy betwongin, daz sy yn gelt mustin gebin in unser fryeheyd, daz sy node tadin, da midde sy dy selbin unser fryeheyd grobelich gebrochin hant.
(10.) Item schuldygen wir sy, daz sy^e sint gegangin in unsern fronhoff und in andir unser molen und hant uns genomen unser esele und unser molenmeystere betwongin mit pandunge, daz sy mustin geben honere und geld vor wyn, dez wir en nicht von rechte schuldig sin zu tunde.
(11.) Item sprechin wir eyn zu, daz dy gartin, dy da lygin gein deme Gry^ende und stußin uff daz vloz von Wydenhusin, daz da ged uff daz wer, daz wir da obirbuwet sin mit wydin und mit pelin me dan wir von rechte soldin.
(12.) Item schuldygin wir sy, daz sy von deme tore unses fronhoffez bys an den weg gein dem Grynde eynen grabin han gemacht dorch unser rechtlich eygin, da midde sy uns unser eckere hant benomen.
(13.) Item sprechin wir en zu umme den ecker, der da stußet aben an dy bruckin zu Wydenhusin und czuhit sich her uff ouch gein unserm Bygin, daz unser rechtlich eygin ist, daz sy sprechin, ys sy eyne gemeynweyde, dez wir hoffin, daz dez nit in sy.
(14.) Item schuldygen wir sy^e, daz sy dy brockin gein Ko^elbe obir daz wazzir nyt machin und in buwe haldin, alse sy^e soldin, gein der brockin, dy wir machin und bu^ewelich haldin by unserm huse obir dy Loine, dez sy nit indunt nach lange ziit nit gedan inhant. Dez wir grobelich schadin gnomen han und tegelich nehmen.
(15.) Item sprechin wir en zu, daz sy unsen gnedygen herren von Monster, dem got gnade, dorzu brachtin und yn anewysetin, daz er uns lyez belu^edin mit der glockin und uns zu gerychte hyz, alz wir ungerechte lude werin, dez wir hoffin, daz wir dez nit inwarin und gode getruwin, daz wirs noch nit insin. Dor umme wir nit woldin nehmen alz viele alz nymant genennen mochte gu^edez, daz das also were gewest adir noch were.
(16.) Item schuldygin wir sy, daz sy uns nehmen dy eckere obewendig unser bruckin by deme Steynwege obin gelegin, dy von aldir und vor langir ziit gehord hant und gehorin zu der kirchin zu Wierde, und machin dy zu uyner gemeynde.
(17.) Item sprechin wir en zu, daz er burgerschin mit namen Lucze Wyldin der selbin eckere ingeczunet hat zu erme gartin, dez nit sin solde, want sy zu der kirchin horint, alz vore gescriebin ist.
(18.) Item schuldygin wir sy, daz sy uff unser alt eygin, daz uns Flamme ir meddieburgir lange ziit vor cynset hat, mit yrme vehe frevelich gefarin sind und hant uns daz graz doruffe abe geetzet und uns unser wydin abe gehouwin und czune zu brochin.
(19.) Item sprechin wir en zu, daz sy uns, mit namen Lotze Brunyng und Ruckel Gambach, hant gnomen unser medemen uffe eckirn by den Syechin gelegin, dy uns gebin daz fierde seyl, und hain uns daz zwey jar getan.
(20.) Item schuldygin wir sy, daz sy hinder dem fronhoffe hant gegrabin eyn grabin, daz vore eyn weg waz, und hant den virgrabin und den weg uff gedrungen.
(21.) Item sprechin wir en zu, daz sy hinder Wydinhusin uff dem unsern czwene grabin hant gegrabin und hant den eynen undir sich geteyld und ingezunt und gartin druz gemacht.
(22.) Item schuldygin wir sy, wan sy yr keller grabin, daz sy erdin in unsern wazzirgranc uffe dy molen gende, daz das daz wazzir yrret uff dy molen zu komende.
(23.) Item sprechin wir en zu, daz Heinrich Schenbeyn yr midde scheffin unde borgir uns nymmet unsers ackirs eynteyl vor dem Barfußin tare gelegin und hat den ingezund zu sime gartin; den selbin flegkin Ruprath Wisgerwer yn dysem jare virbuwit haid.
(24.) Item schuldygin wir sy, daz rockel Gambach yr middescheffin und bu^erger unsers spytalz gartin und andir gartin bestandin hat umme uns und hat uns gered der stede brieff dorobir zu geben und gybt uns den nyt alz gered ist.
(25.) Item sprechin wir en zu, daz Heinrich zum Arn yr middescheffin und burger uns unsern medemen nyt ingybt von den eckirn undir deme Heyn gein der Ketzerbach gelegin.
(26.) Item schuldigen wir sy, daz Syfryd von Gyndirna yr middeburgir uns von den eckirn, dy Herman Oysterprachtes warin dy uns gebin sollin daz echte seyl, da gybt yr uns nicht dan daz czwelffte.
(27.) Item sprechin wir en zu, daz sy mit yrn seckin, dy sy zu unser molen schyckin, da in eyme nyt me insolde sin zur fure dan eyn halb maldir korns, da dycke me inne ist, daus unser esele gewesin mogin zu trende, und obirlestygin sy da midde, daz wir dez schadin nehmen an unsern eseln und an unser multer.
(28.) Item schuldygin wir sy, daz sy gesast und gemacht han eyn bedehus in unser parre und eyn bylde hant dar in gesast und da oppir nehmen, daz sy zu rechte nicht nehmen soldin, daz der parre eyn grobelich schade ist und noch degelich schadet.
(29.) Item sprechin wir en zu, daz sy unserme perrer sine eynse virbodin hant, daz sy eme nit gefallin, daz sy mit dem rechtin keyn macht inhan zu dun.
(30.) Item schuldygin wir sy, daz sy in unser parre buwemeystere setzin und intsetzin ane wißin und willen yrs perrers, dy selbin buwemeystere yrme perre keyne rechnunge dunt noch dun inwollint, alz sy schuldyg sint zu dunde und recht und gewonlich ist in eyner yclychin parre.
(31.) Item sprechin wir en zu, daz sy unser kirchin zu der parre abe gebrochin hant und inteckit me dan sy gebuwin mogin alz ziitlich alz dez not were, und der elter eynteyl alz unbefredit sten, daz grobelich foichte ist, daz ampt der heylgin messe zu uben und daz hoichwirdyge sacrament dez lychnams unsern herren Ihesu Christi nach crystlicheme gesetze der heilgin cristinheit da zu handelne vor ungewyddere wyndez, snehez und reynes, dor umme ouch daz volg in unser parre gehorind in der vorgenanten kirchin nyt blybin en mag by gotlicheme dinste, alz recht ist und crystliche gewonheid zu menchin ziidin, dorch obegenante gebrechin, daz das unserme perrrer grobelichin schadin bracht hat und noch degeliche brenget.
(32.) Item schuldygin wir sy, daz sy dem selbin unserm perrer sinen gartin undir deme parhoffe gelegin geuffint und zu^ebrochin hant und eynen weg da uff und durch gemachit hant ane sinen willin, wißin und word, dez nit sin in solde, want sy den selbin gartin muren und befredin soldin und eme den meren, alz gered ist, an dez gerthins stad, daz hindir deme huse, daz unser parre waz, gelegin, dar uff sy yrn kirchoff gewydirt hont.
(33.) Item sprechin wir en zu umme daz vorgenant hus, daz sy abe brochin unde den vorgnant yn kirchoff daruff wydirtin, daz unser parre waz und daz czweyn erbern personen zu yrme liebe geluwin waz, dy selbin person sy mit eyme andern huse alz gulden alz daz waz, yr beidir lebtage behusin und bewysin soldin, also wan sy dy person beidesamt mit me inwerin, so solde daz selbe hus, daz sy yn alz gut alz daz andir waz bewyset hetten unde gegebin, an unser parre gefallin ledeclich und eygintlich an dez andirn vorgnantin huses stat, daz sy daz noch nit getan inhant noch in dunt, alz daz gered ist und mit tedingen begryffen.
(34.) Item schuldygen wir sy, daz sy dem vorgnantin unserm perrer dorch eyn gartin gelegin vor dem Barfußin tare, den er virluwet hat umme eyn jerlichin eyns, gegrabin und uff geworffin hant, und daz andirteyl hant sy andirludin bewyset und gegebin, mit namen Elsin yr middeburgersche, etwanne eliche husfrouwe waz Wygandes an dem Berge dem got gnade, und han en also intweldyget sinez gartin und sinez eynses, daz von rechtes wegen nicht sin solde.
(35.) Item sprechin wir en zu, daz testament, daz gesast wird dem obegnantin bedehuse und bylde und unserme perrer und sinen gesellin, daz daz dy buwemeystere uff hebint und gebint unserme perrer adir sinen gesellin nicht.
(36.) Item schuldigen wyr sy, daz der burgermeyster und der stade schribir gestandin sind zu sant Kyliane und hand da breive gelessen ubir unser perrer und syne gesellen, dy yn nyt geschribin enwaren noch yn nyt zu horent zu virkundygen.
(37.) Item sprechin wir yn zu, daz sy den kernder hand gemacht eyme rendhuse, also als daz eyn gewyhid gots hus ist.
Item schuldigen wir sy, daz uns getrybin hain myt yme vehe ubir unser gersten und ubir unser habern, also als is vierzehin tage stund in gudin dingen, und santen da by ir knechte und taden daz myt rechtem vorsatze und virabele, und haind und daz zu zweyn malen getan.
(39.) Item sprechin wir yn zu, daz dy oppirlude zu unser pharre, dey alwege gesatz und gewunnen sin mit wizsinde unsers pherrers und dem syne globede dun, ym und der stad gereid zu sinde zu allin zijden wan dez not geschehe, nachtes und dages, dez dy vorgnanten oppilude nyt endun und sprechin, sy habin myt unserme perrer nyth zu schaffin, sy habin globit und gesworin eyme burgermeyster, da von gros grobelich schade mochte entstein den selin, daz eren enthalbin mochten gesunet werdin sy heyligen sacrament zu andelagen, daz sy dez und andir sumonge in der kirchin unser parre vyel getan hain und tegeliche tun, also als sy des nyt tun ensullin, als vor ist geschribin.

Sprache des Originaltextes

deutsch

Nachweise

Textgrundlage

Stückangaben, Regest

Wyss, UB Deutscher Orden 3

Original

Wyss, UB Deutscher Orden 3

Zitierweise

Landgrafen-Regesten online Nr. 11654 <https://www.lagis-hessen.de/de/subjects/idrec/sn/lgr/id/11654> (Stand: 28.04.2024)