Landgraf Wilhelm I. schlichtet zwischen Rat und Gemeinde in Grebenstein

Regest-Nr. 11951

Tradition | Regestum | Original Text | References | Text Basis | Citation

Tradition

Engrossment:	Ratsarchiv Grebenstein. Pergament, in schöner Schrift, 4 Blätter in kleinem Folio, mit bunten Seidenschnüren in den fürstlichen Farben (rot, orangegelb, grün und weiß) in der Mitte durchzogen.
Prints:	Falckenheiner, Grebenstein, S. 221-226.

Regestum

Auf Grund der Streitigkeiten zwischen Bürgermeister und Rat der Stadt Grebenstein auf der einen und der Gemeinde der Stadt auf der anderen Seite, sieht sich Landgraf Wilhelm I. veranlaßt der Stadt eine neue Ordnung zu geben.

Original Text

Wir Wilhelm der elter - - Thun kunt - - Naichdem sich mirgliche und swere geprechen, gespenne und zcweytracht zcuschen unsern lieben getruwen Burgermeister und Raithe unser Stait Grebinstein an eynem, der gemeynde daselbst am andern teil erouget. Die sie uns von beiden teilen, daruber zcuerkennen - - eruffent - - So haben wir - - eyne nuwe Ordinacion und Regiment, besundern eyne Kemmerey sezen, und die den obgemelten Burgermeister, Raithe, der Gemeinde Burgermeister, allen Hantwergsmeistern, zcusampt der ganzen Gemeinde unserer stait Grebinstein ubergebin lassen. - - - Anfenglich und zcum ehirsten haben Wir unser Stait Grebinsteyn naich lobelichem herkommen anderer unser Stedde In dry burschafte teilen laissen, hinfurter deste bequemlicher Ire Ampte daruß zcubestellen.
Item. Man sal kyesen zcwene Kemmerere vor Pfingsten uß zcweyen Burschaften, eynen des Raits Den sal Kyesen die Gemeynde, Den andern uß der Gemeynde, den sal der Raith kiesen. Also sal der Raith kiesen In die Gemeynde und die Gemeynde In den Raith. Die zcwene gekorn kemmerer sollen globen und sweren mit ufgerichten fingern, gestabedes eydes - - mit der stait gude getruwlich umbzcugehin, zcuthunde eynem als dem andern naich geborden Und dem gemeynen nuz vor Zcusin nach allem Irem vermugen.
Item Sollen dieselbigen zcwene Kemmerer ufheben alle Inkommen und gefelle von Grebinstein Nemlich geschos, Zcinse, Renthe, Zcyse, stede gelt, wegegelt, burgergelt, gilde gelt, pfan gelt, Gelt uß den Stocken nichts ußgescheiden, und sendtgelt das sal man an gots werg bringen.
Item. Wan sich eygent uszcuheben das rechte geschoß halb vor winachten und halb vor mitfasten, dar zcu sal man kiesen zcwene man, eynen uß dem Raithe und eynen uß der Gemeynde, Die zcwene sollen sin uß der dritten Burschaft, da die vorgekorne kemmerer nit gesessen sin noch wonen. Die zcwene sullen dan den kemmerern helffen ufheben das rechte geschos In biewesen des Burgermeisters.
Wan diesse egnanten gesessen han und Geschos ufgehaben, wan sie dan vom Raithuße abegehin wollten, So sullen die kemmerer ufheben das gelt und sullen das in die kammern tragen und In Iren kasten fließen und sollen die zcwene biesizer die Register zcu sich nehmen - - .
Item wan man sizet und geschos ufhebet, so sal man haben eyn breth, und sal daruff Innemen der von Grebinstein geschos, und das sollen ufnemen die zcwene kemmerer, zcwene schossere und zcwene biesizer In biewesen des burgermeisters des staitschribers Und was dieselbigen alsdan gezcalt ufnemen, sal verczeichent werden - -.
Item Wan nu die vorgerurten geschos sozen - - so sal man Irer Iglichem Zcwelff heller, und Staitknechten ydem nuhen heller vor eyne malczit geben.
Item sollen die zcwene Kemmerer berechen die geschos Register - - In geinwurtigheit der Burgermeister von dem Raithe, Burgermeisters von der gemeynde, und Iglichem Hantwercke eyner, funf treflichen von der gemeynde darzu geordent. Solich Rechenschaft sal gescheen von den Kemmerern uf den Sonnabent naich vocem Jocunditatis fur pfinxten. Und wan sie han berechent, haben sie es dan verdienet, so sal man Ine gutlich dancken, und alspalde uf denselben tag zcwene andere Kemmerer kysen, die soln auch eyn Jar und nit lenger kemmerer sin - -. Auch sal man uf dieselbe zcyt einen gemeinen Burgermeister Kiesen. Item Sollen die zcwene kemmerer uf dem Raithuse eyne besunderen kammern haben, Die sollen sie uff und zcu sließen anders nymant, Dor Inne sal man haben eynen kasten, Der sal haben vier slosse (und) vier slossel und keyner sal des andern Slos konnen sliessen. Eynen slussel sal haben der Burgermeister vom Raithe, Den andern sal haben der gemeyn Burgermeister, Die andern zcwen slussel sollen haben die zcwene Kemmerer. Und In solichen Kasten sal si der von Grebinstein gelt - -. Und In demselben Kasten sal eyn besundern Ingeschlossen angehaft Kestchen (sin) Dor Inn sal behalten sin Der von Grebinstein gros Ingesigel, Privilegien und heymlichkeit - -.
Item man sal des Jars kysen zcwene Zcepper und Winmeister - - Und der sal der Raith eynen kysen In die Gemeyne Und die gemeynde eynen in den Raith - - Und sollen die winmeister alle viertel Jars eyne erfarunge thun, und ye zcu halbem Jahre eyne volnkomen Rechenschaft - -. Was dan an den zcinsen verdienet ist sal man den kemmerern verhandelogen - - Und sollen die Winmeister keynen frischen Win uß Irem Keller kommen laissen sie enhaben dan pfandt adir gelt dar vor, und solich gelt In eynen stock adir kasten In dem Keller alsbalde thun werffen.
Item Wan man eynen Schenken ufnymt - Der sal der stait vor hundert gulden gewisse Burgen sezen - -. Es ensal auch der schencke - solich gelt nit anders, dan als er das usnymt, verwechsseln adir verwandeln - -.
Item Umb nuzs willen der stait sollen abegestalt sin alle Winckel Zceche und alle Kost - -. Auch kein geschenke thun Herren, Rethen, Stedden, noch keynen Personen, dan mit willen und wissen der obgenanten - -. Und was wins man also verschenkt, den sollen die Kemmerer zcum winschenken bezcalen.
Item. Also sal man kysen alle Jair uß iglicher burschaft zcwen Buwmeister, eynen des Raiths, und eynen der gemeynde uf den fritag In den zcehin nunen. Dieselbigen sollen buwen und arbeiten laissen Und - - Die (kemmerer) sollen Ine lonen - -.
Item. Were es sache, Das die Burgermeister adir Imand uß dem Raithe ryten sollte - - Do sal allewege eyn alt kemmerer mit ryten. Was gelder dan der alte kemmerer mit zcunemen enpfangen Hait, sal er berechen, so balt er zcu Huße kompt, den Nuwen kemmerern, Von den er das gelt empfangen hait.
Item. Wilch man vom Raide adir gemeynde zcu - - eyme Ampt erwelet und gekorn wirt, Der sal das mit willen also zcu sich nehmen - -.Item. So die Zcyt quemen, so man das geschos ußfordern sulte, so dan einich burger, Burgerschen adir Inwoner were, der dorane sumig adir zcu gewontlichen geordentenn stetten zcubringen widderspennig worde, silten Burgermeister und Raith die gewalt volwort und macht haben, dem sine Hußtur umb solich Hinderstellig geschos uß dem angel zcuheben, Und dar nicht widder In solich geschos sie dan ußgericht und beczalet - -. Und des - - zcu Urkunde - - haben Wir - Diesse unsere nuwen ordinacion und Kemmerey, In der mitte mit bunten siden snuren unserer farbe durchzcogen, mit unsern fürstlichen Ingesigel anhenglich und wissentlich besigeln laissen. Geben In unser stait Cassel am Montage naich Divisionis Apostolorum A.D. Millesimoquadringentesimoctogesimoctavo.
Item, als wir - - underricht sin, Das Ine die Zcyt der Rechenschaft uf den Sonabint naich vocem Iucunditatis - - vast unbequeme sy. So haben wir Ine - - solich zcyt gnediglich verandert und gesäzt uf den tag remigii uf denselben tag rechenschaft zcuthunde, und ander kemmerere und gemeynen Burgermeister zcu kiesende - -. Gescheen - - Cassel Am dinstag Exaltationis s. Crucis a.d. millesimoquadringentesimononagesimo.

Language of the Original Text

deutsch

References

Other Persons

Hessen, Landgrafen, Wilhelm I.

Other Places

Grebenstein

Keywords

Bürgermeister · Stadtordnungen · Räte · Streitigkeiten, Vermitteln in · Handwerksmeister · Kämmerer · Stadtrechnungen · Abgaben · Steuern · Zinsen · Renten · Rathäuser · Stadtknechte · Stadtschreiber · Rechnungslegungen · Weinmeister · Bürgen · Schankkonzessionen · Stadtbaumeister · Baumeister · Steuern, Unbezahlte

Text Basis

Regestum

SH

Document Particulars

Falckenheiner, Grebenstein

Original

Falckenheiner, Grebenstein

Citation

Landgrafen-Regesten online Nr. 11951 <https://www.lagis-hessen.de/en/subjects/idrec/sn/lgr/id/11951> (Stand: 23.04.2024)