Bündnis zwischen Landgraf Hermann und der Gesellschaft vom Horn

Regest-Nr. 12017

Überlieferung | Regest | Originaltext | Nachweise | Textgrundlage | Zitierweise

Überlieferung

Drucke:	Landau, Ritter-Gesellschaften, S. 184-187 Nr. 46.
Regesten:	Landau, Ritter-Gesellschaften, S. 184 Nr. 46.

Regest

Die Gesellschaft vom Horne verbündet sich mit dem Landgrafen Hermann von Hessen.

Originaltext

Wir Guntram von Hoßfelt, Erbin von Drahe Rittere; Wigand von Erffinshusin, und Heinrich Schencke, die vier gekorin von diesim iare, obir die gesellschafft vom Horne und die gesellinn alle gemeynlichen derselben gesellschafft vom Horne, bekennen an diesem uffin bryve, vor uns, und alle unsir gesellen, die izunt in derselben unsir geselschaft vome Horne sin, odir noch vor yn komen, daz der edel unsir liebir herre, herre Grafe Wilhelm Grafe zu Kazenelnbogen tzwischen dem hoichgeborin irluchten fursten, unsirm lieben gnedigen Junchern, Junchern Hermanne Lantgreffin tzu Hessen off eyne, unde uns allen gemeynlichen den vorgenanten gesellen vome Horne, die izunt dorynne sin, odir noch doryn komen, off die andern syten, eine eintrechtikeit uns virbunt geredt hat, also als hir noch geschriben stet. Ztu dem ersten sal unsir gnediger Junchere vorgenant uns den gesellen vome Horne, mit funff und tzenzig mitgleven, erbar lude behulfen sin, off sine koste, schadin und virluste, wo wir sin bedorffen, und en des ermanen, do wir recht han und unsir mechtig zu syn sal und hers mit eren gethu mag, und waz do gewunen worde, daz sal man nach manzal gewopniter lude, die des tages in dem felde sin, glich teylen. Nemen wir abir schaden, den sal der egenante unsir gnediger Juncher vor sich, und die synen, und wir vor uns und die unsirn liden und habin. So sollent wir die gesellen vome Horne alle demselben unsirm gnedigen Jungkern, dienen und behulffen sin off sine koste, schadin, und virluste, woher unsir darff und her, odir sine amptlude, uns des ermanens, do her recht hat, und wir daz mit eren getue mugen. Waz danne do gewunnen worde, daz sal ganz und gar unsirs gnedigen Junchern sin, one waz zu der buite gehoret, daz sullint die, die des tages in dem felde sin beydersyt glich teylen. Nehmen wir abir in demselben syne dynste schadin mit gefencniße, odir mit reysiger habe, den sal unsir gnediger Juncher egenant uns abelegen noch glichen mugelichen dyngen. Wer ouch sache, daz der egenante unsir Jungherre uns den vorgenante gesellin vome Horne icht schuldig were odir worde, und daz an yme als bescheidelich ist irfolgeten, queme daz darobir zu pfandunge, wilch unsir die weren, die also pfenten, dye solden mit den pfanden pfentlich geborin, ane argelist, und ane geverde. Ouch sullen wir, die gesellin vome Horne, dem obgenanten unsirm gnedigen Junchern sine straßin, lande und lude, truwelichin und vestlichen helffin beschodden und beschirmen, mit allir unsir muge und her uns, und unsir guteren wedirumb deßelben glich an geverde. Wer ist beredt, daz unsir gnedigir Junchere odir sine amptlude dy dysyt Spißes und wie yn wider sullint unsir eyner dem andern sine tage truwelichin helfin leisten, wo uns das beidersyt not geschit. Wir gesellin vome Horne, sullint ouch dem megeschribin unsirm gnedigen Junchern odir sinen amptludin, wo yn des not geschit, truwelichin folgen und behulffin sin, mit alle unsir macht, unde sie uns deßelben glich widir umbe hir dysys spißes, und sal her und sine amptlude in alle unsirn sloßin do heyme sin, und wir in sinen sloßin wedir, wo wir daz von beyden siten mit eren gethun mogen. Waz ouch, daz der vorgeschriben stugke und artikel unsir ein an den anderen ztu vordern had odir not geschee zu erworben, daz sal her, odir sine amptlude, an den, die zu der zit odir unsir geselleschafft gekorin sin, und wir an yme, oder an sinen amptluden dy dysyt Spißes vorderen. Dieße eintrechtikeyt und virbuntniße sal werin tuischin dem egenanten unsirm gnedigen Junchern und uns allen den gesellen vome Horne, allen die izunt in derselben unsir geselleschaft sin, oder noch doryn komen, drye ganze iar, die noch einander nest komt, noch datum dieses bryves und alle deße vorgeschriben rede stugke und artikel und ir iclichen besundern, globen wir die obgenanten viere, und wir andern alle gemeynlichen die izunt in disir selben unsir geselleschaft vome Horne sin, oder noch doryn komen, ganz, gar und wol feste und stete zu haldene, als wir daz ouch, dem egenanten unsirm gnedigen Junchern Hermanne Lantgrafin zu Heßin, in guden truwen, an eydes stat, in diesim brive globt und globen unverbrochlich zu haldin ane alle argeliste, und ane alle geverde. Mit orkunde dieses brives virsigelt mit unsir ganzen geselleschaft gemeynem Ingesiegel, doruff wir gelobt und gesworn habin, des wir uns alle die geselleschaft gemeinlichin gebruchen. Datum et actum anno domini M° CCC° lxx nono quarta feria ante fabiani et sabastiani.

Sprache des Originaltextes

deutsch

Nachweise

Weitere Personen

Hoßfelt, Guntram von · Trohe, Erwin [II.] von · Erfershausen, Wigand von · Schenk zu Schweinsberg, Heinrich [IV.] · Hessen, Landgrafen, Hermann II. · Katzenelnbogen, Grafen, Wilhelm II.

Weitere Orte

Katzenelnobgen, Grafen · Spieß (Gem. Frielendorf)

Sachbegriffe

Hilfe, militärische · Rittergesellschaften · Horner · Bündnisse · Straßen, Sicherheit auf · Söldner · Beute, Aufteilen der · Gefangene · Lösegelder · Amtleute · Streitigkeiten, Vermitteln in

Textgrundlage

Stückangaben, Regest

Landau, Rittergesellschaften

Original

Landau, Rittergesellschaften

Zitierweise

Landgrafen-Regesten online Nr. 12017 <https://www.lagis-hessen.de/de/subjects/idrec/sn/lgr/id/12017> (Stand: 27.04.2024)