Regesten der Landgrafen von Hessen

Erweiterte Suche »
Ergebnismenge »
Treffer 12 von 38

1439 September 1

Der Graf von Hennenberg tauscht einen Hof mit dem Egidienstift in Schmalkalden

Regest-Nr. 9107

Überlieferung

Drucke:	Hennebergisches UB 7, S. 81 f. Nr. 112.

Regest

Graf Wilhelm zu Henneberg ertauscht von dem Egidienstift zu Schmalkalden den Hof unterhalb des Stiftes bei der Schule, den die Fürstin Elsbeth von Anhalt inne gehabt hat, gegen ein Freihaus und den Grund Steinbach.

Originaltext

Wir Wilhelme, von gots gnaden Graue vnd herre zu Hennenberg, Bekennen vnd thun kund mit diesem offen briue fur vns vnd vnser erben allermeniclichen, das wir ein ewige grüntliche vnd vnwiderrufliche wechselunge gethan haben Mit den wirdigen Erbern vnd Ersamen herren hern Conrad Techande vnd dem gantzen Capitel vnsers stifftes sanct Egidien zu Smalkalden, vnsern lieben Andechtigen, allen jren nachkomen vnd stiffte, Also das sie vns vnd vnsern erben gegeben haben vnd ewiglichen valgen laszen sollen vnd wollen den hoff zu Smalkalden vnder dem stiffte bie der schule, da vorzyten die hochgeborne fraw Elszbeth, fürstin von anhald, vnser liebe Müme selige, jnne gewest ist, mit behusunge, tiche, gartten vnd aller siner zübehörunge vnd darzu yr hoffhüs zünechst bie dem itztgenanten hoffe, an der stadmüren gelegin, mit stadel, gartten vnd hoffreit, als wyt vnde breit daz allez umbfangen vnd biszher darzu gehord had, darumb vnd dagegen haben wir fur vns vnd vnser erben den genanten herren, jren nachkomen vnd stifft gegeben vnd zügeeignid, Geben vnd eigen yn zü vnd mit Crafft diesis briues Eynen gründ vnd geüilde, genand der Steinbach, ligende obir Smalkalden, mit eckern, wissen, halcz, velde, wonnen, weiden vnd sinen rechten herkomenden friheiten vnd zugehorungen, als vns daz von Betzen Lengeheübte seligen todishalbin verlediget vnd heimgeuallen ist, der daz von vns zü rechtem frihem manlehen gehabt vnd herbracht had, nicht uszgenomen vnd darzü geben vnd eigen wir jn zu Ein frihehüs, daz an Leuffers seligen hoffe gelegin vnd Heyn von Rotha gewest ist, vnd ein hüs, daz zü Leuffers hoff gehord had vnd hinden daran gelegin ist vnd hievor vnser backhus was, darzu wir jn des egenanten hoffes hoffreit souil geben, eigen folgen vnd vermercken laszen wollen, daz die husere mit der vermerckten hoffreit alswyd begriffen werden, als daz vorgenand yr hoffhüs mit stadel, gartten vnd hoffreit beüangin gehabt had. Vnd wir Gereden, sollen vnd wollen aüch jn daz allez frihe schicken von dem Hochgebornen fursten hern Ludewigen, lantgrauen zu Hessen, vnserm lieben Oheimen, vnd der stad Smalkalden vnd sie aüch dabie frihe behalden angeuerde. Vnd die vorgenanten herren vnd alle yr nachkomen sollen den egenanten gründ vnd geüilde, den Steinbach, vnd die zwey hüsere mit jren hoffreiten vnd vorgeschribin zu vnd jngehorüngen ewiglichen an jntrag vnser, vnser erben vnd allermeniclichs fur recht frihez eigen yre vnd yres stifftes jnnhaben, niszen, nützen vnd nach yrem besten gebruchen vnd darum ewiglichen vnd alle yare jerlichen die hochgebornen hern Wilhelmen, Grauen vnd herren zu Hennenberg, vnsern lieben vater, vnd fraüwen Annan, Herzogin von Brunswig etc. vnser lieben mütter seliger gedechtnüs, iglichs jares zu zweyen gezyten, nemlichen off den nechsten fritag vor sanct Kilianstage vnd off sanct Simon vnd Judas, der heiligen appostelntag zü nacht mit lobelichen vigilien vnd off die nechsten mörgen darnach mit dem ampt der heiligen selemesse redelich vnd ordenlich begehen vnd alsbalde vnser, vnser erben vnd nachkomen gedechtnis halden ye an allen jntrag, anuerzug vnd angeuerde. Darumb gereden wir fur vns vnd vnser erben die obgenanten herren, alle yre nachkomen vnd stifft bie dem egenanten Steinbach, den husern vnd yren obgerurten zü- vnd jngehorüngen vnbedrangit zu bliben laszen vnd sie darzu getruwelich zu hanthaben, zü schützen vnd zü schüren als andere die vnsern vnd daz vnsere allesangeuerde.
Des zu warer ürkunde vnd ewiger vestigheid habin wir vnser jngesigel fur vns vnd vnser erben mit rechter wiszen an diesen briff thün hencken. Gegeben nach Cristi vnsers herren gebürd vierzehenhündert vnd jn deme Neünvnddrissigsten jaren off sanct Egidien des heiligen Abts tagk.

Sprache des Originaltextes

deutsch

Nachweise

Textgrundlage

Stückangaben, Regest

Hennebergisches UB 7

Original

Hennebergisches UB 7

Zitierweise

Landgrafen-Regesten online Nr. 9107 <https://www.lagis-hessen.de/de/subjects/idrec/sn/lgr/id/9107> (Stand: 06.05.2024)