Zunftbrief für die Schmiede in Kassel

Regest-Nr. 16627

Überlieferung | Regest | Originaltext | Nachweise | Textgrundlage | Zitierweise

Überlieferung

Abschriften:	Staatsarchiv Marburg, Urk. 12, Nr. 12, 15. Jahrhundert, Papier.
Regesten:	Salow, Das Zunftwesen in Kassel, S.138 Nr. 69.

Regest

Landgraf Ludwig I. von Hessen gibt den Schmieden zu Kassel einen Zunftbrief.

Wortlaut der Datierung

Datum anno Domini Mo CCCCo vicesimo primo ipso die beati Arnolfi.

Originaltext

Wir Ludewig von Gotis gnaden lantgrave zcu Hessen bekennen uffentlich in diessem briffe vor uns und unser erben, das wir dem hantwerke den smedden, messersmedden, kopperslegern, gropengissern und kannengissern gemey[n]lich zcu Cassel unsern lieben getruwen geben und gegeben han mit crafft diesses briffes eyne bruderschafft und innunge in aller masse als hirnoch geschreben steid also.
1. Wer sich ires hantwerkes und bruderschaff gebruchen wil, die sal eyn ingesessen burger zcu Cassel sin ader sol zcu stund dar burger werden und sal syn eyn recht eekint, sine ere woil verwart han, syn hantwerg konnen, der sal die bruderschaff und innunge koiffen umbe seß gude rynsche gulden adder werunge darvor als zcu Cassel genge ist, solich gelt uns und unsern erben halb, unser staid Cassel zcu irem buwe eyn vierteil und dem hantwerke das ander virteil werden und gefallen sal, und darzcu geben eynen czober byrs dem vorgenanten hantwerke und eyn phunt [wa]sses czu irem geluchte und den meistern eyn stobechen wyns und irem knechte seß pheninge und sal die innunge koiffen unde gewynnen zcu den hantwergesmeistern wan sie by eynander syn und zcu nymande mer.
2. Auch ensal dy megenante hantwerke nymand uberfaren ader veyle haben mit keynerley werken das sie gemachen konnen, er ensy dan in irer bruderschafft und innunge, eß enwere dan eyn gemeyne fryhe jarmarket allermenliche. Wer eß darpoben tede, der solte eß vorbussen mit dren schillingen phenningen hescher were uns, unser staid Cassel und dem hantwerke iglichem als vor underscheiden ist. Und die meister sollen das werk uffnemen und wan der markete vorginge so solden sie ime sin werk widdergeben und darmidde gehin lassen alß fere die bruche gegeben sin.
3. Auch wilcher meister eynen koyff koiffte der zcu synem hantwerke gehorte wilcherley der were und kummet eyn syn middebruder er das er das werk beczalt haid der des werkes auch bedarf, dem sal er des eyn teil lassen umbe denselben phening als er gekoifft haid aund uber die helfte sal en nymant dringen. Quemen aber zcwene, drye ader me von synem hantwerke, den sal er den koiff halb lassen umbe denselben phening als er den gekoifft haid und uber die helfte sal yn nymant dringen. Und wer des nicht thede als decke er das vorbreche sal er daz vorbussen mit seß schillingen pheningen der egenanten were, die uns, unser staid Cassel und dem hantwerke gefallen sollen.
4. Vortmer wer eynen snedegast hette dem er gearbeit hait eyne zciit und will der gast von ime cziihen er dan er yn beczalet, so sal ime nymant arbeiden von synen werkgenossen als fere den werkgenossen vorboden wirdet von iren meistern dy sie zcu der zciit han als decke des noit ist er ensy dan vor gutlich beczalt. Und wer dem gaste darpoben arbeite, der sal das vorbussen mit seß schillingen pheningen der obgenanten were, die sollen uns, unser staid Cassel und dem hantwerke gefallen als vor underscheiden ist.
5. Auch ensal keyn meister nymande gestaden eigen werk zcu machen in syme huse er ensy dan in der bruderschaff und innunge. Und wilch meister eß darpoben thede, der sal das vorbussen mit seß schilling pheningen der egenanten were, dy sal man teilen als vorgeschreben stehit.
6. Vortmer wer eynen knecht aber jungen zcu ime nymmet, den knecht ader junge sollen zcu stunt unser lieben frauwen geben eyn phund wasses und den meistern eyn czober birß und wers das sie eß nicht vormuchten, so sollen eß die geben ane widderredde die sie zcu yn nemen.
7. Auch ensal keyn meister dem andern synen knecht abemyden, syn cziit sie dan umbe als er in gedingit hait. Und wer das daruber thede, der sal der der en gedynget hait den deme vorbiten. Heldet er yn dan darpoben, so sal er daz vorbussen mit seß schillingen pheningen der vorgenanten were und sal die teilen als vorgeschreben stehit.
8. Vortme sal man alle jar uff sent Clauwes tag nuwe meister kysen wer dy syn, die ensal nymand widdersprechen wen man kuset. Spreche der dawidder, der sal das virbussen mit eyme phunde pheninge der egenanten were und das sal man teilen als vor geschreben steid.
9. Wer auch in der bruderschaff und innunge ist und von Cassel in eyn ander sloß ader dorf das in des furstenthume nicht gelegen were zcoge, der sollte syne innunge vorlorn habe. Zoge er aber in eyn unser sloß ader dorf in unserm forstenthume gelegen, daz solte ime an syner innunge keynen schaden brengen also das er syne borgeschaff alle jar lose als gewontlicht ist und dem hantwerke seß pheninge uff sent Clauwes tag zcu orkunde.
10. Auch sal man allen gehorsam die widder uns, unser herschaff [und] unser staid Cassel nicht enist halten den meistern die dar gekoren werden als wan sie by eynander syn und iren knecht noch den andern meistern senden von dem hantwerke, da sollen sie zcu stund zcukummen. Und wer des nicht thede und daz geboith virsesse, der sal geben seß pheninge zcu dem geluchte als decke er das thede.
11. Were auch das die meister frageten ab imande icht wissentlich were das der bruderschaff genuzcen adder geschaden mochte und iß das imande wissentlich under in und virswigit das den meistern, der sal das vorbussen mit eyme phund pheninge der vorgenanten were uns und unser staid Cassel und dem hantwerke als vorgeschreben ist.
12. Dusse bruderschaff und innunge sollen alle ire sone die eekinder sin zcumale mit in gebruchen glicher wyse als sie und staitrecht darvon thun.
13. Neme auch eyner wer der were eyns meisters tochter von dem hantwerke vorgenant und wolde sich des hantwerkes gebruchen, der solte die bruderschaff halb koiffen als vorgeschreben stehit [und] das ander halben teil haben von der tochter.
14. Storbe auch der meister eyner und neme syne husfrauwe eynen andern man der in der innunge nicht enwere der die hantwerke uben wolte, der solte die bruderschafft auch halb koiffen als vorgeschreben steit und das ander halbe teil solte er haben von der frauwen.
15. Eß sal auch keyn meister von dem hantwerke gestolen ader raubguid wilcherley das ist koyffen. Wer eß aber tede mit wissen, der solte eß vorbussen mit eyme phund pheninge, das sal uns, unser staid Cassel und dem hantwerke gefallen als vor underscheiden ist. Koyffte ers aber wissens adder unwissens und qwemen die der eß gewest were, den sal er es widdergeben vor den phening als er das gekoifft hette ane widderredde.
16. Was sie auch guder gewonheit ader gebotes under eynander setzten dy widder uns, unser herschafft und stede egenant nicht ensyn, die sollen sie under eynander halten und wilcher sich darwidder seste, der solte das virbussen mit solicher busse als sie daruff sesten. Dy busse sal uns, unser staid Cassel und dem hantwerke gefallen als vor underscheiden ist. Und das solte eyner unser amptman wer der were yn helfen phenden vor die busse als decke des noit gesche mit hulfe des rades zcu Cassel.
Diesses zcu orkunde han wir unser ingesigel an dissen briff thun henken. Datum anno Domini Mo CCCCo vicesimo primo ipso die beati Arnolfi.

Sprache des Originaltextes

deutsch

Nachweise

Aussteller

Hessen, Landgrafen, Ludwig I.

Empfänger

Kassel, Schmiede

Siegler

Hessen, Landgrafen, Ludwig I.

Weitere Orte

Kassel (Stadt Kassel)

Sachbegriffe

Handwerker, Schmiede · Handwerker, Messerschmiede · Handwerker, Kupferschläger · Handwerker, Kannengießer · Zunftordnungen · Zünfte · Bürger · Zünfte, Aufnahme in · Währungen, Rheinische Gulden · Zunftmeister · Märkte · Hehlerei · Räte · Amtmänner

Textgrundlage

Stückangaben, Regest

Eckhardt, Stadtrechtsquellen Kassel

Original

Eckhardt, Stadtrechtsquellen Kassel

Zitierweise

Landgrafen-Regesten online Nr. 16627 <https://www.lagis-hessen.de/de/subjects/idrec/sn/lgr/id/16627> (Stand: 27.04.2024)