Regest-Nr. 12002

Tradition | Regestum | Original Text | References | Text Basis | Citation

Tradition

Regestum

Fortsetzung des Volltextes von Landgrafen-Regesten ID 3252

Original Text

Dritten Teil, und stet drie hundert Lodige Marg Silbers, Molhuser Gewicht, und subbenhundert und vierzig und anderhalben Gulden und sess Behemsch und darzu funff und Subbenzig marg, anderthalben Fierdung, Casselscher Gewicht und were Lodiges Silbers, darzu hundert marg Aldendorffscher Were, ye vier Phunt Heller vor eyne Marg, Wildecke das Sloss, und stet Achthundert Gulden, ffredwalt das Sloss, und stet Achthundert Gulden, so sin subbenzig Gulden zu verbuwen daran verschreben, Barcfeld das Sloss drie teil stet Funfhundert Gulden, Aldenburg an der Eder stet vier Dusent Gulden, dritte halb hundert Gulden und Funff und vierzig Gulden, dieser Iztvermelten verphanten Sloss und Stedde Summa so eyn Igliche versazt und verphant worden ist brenget an eyner Summa summarum, daran sie mit Unsern middebenometen und zugegebenden gerechent ist wurden, vierzcehen Dusent gulden und vierzcigesten halben Gu^elden und sess Behemsch und darzu Driehundert marg sielber, mo^elhuser Were, und darzu auch funff und Subbenzig Marg und anderthalben Fierdung Casselscher Were, und hundert Marg Aldendorffscher Were, disse Iztvermelten verphantten und versazten Sloss und Stedde Gerichte und Gebiete, mit Iren Dorffern, auch allen und Iglichen Irn zu und Inngehorungen, Renthen zinssen Nuzen, Herlichkeiden, Gerechtigkeiten, und Gefellen, ersucht und unersucht zugeben und zu sezen Wir obgemelten DrieReynhart, Ebert und Ludewig mit Irer abelosunge dem Lande zu Hessen und ersten Teile, dieselben abelosunge dann der Furste der zu demselben ersten Teile kommen wirdet thun mag, und die Widder also an sich brengen und mochten Wir dann oben dem ersten und auch dem andern und zweiten Teile zuzugeben und zuzusezen berurt han, so zu geben und zusezen Wir diesse Iztvermelten verphanten Stedde und Slosse dem Lande zu Hessen und ersten Teile, also das sie mit Irer zugehorunge und abelosunge die dem ersten Teile disser Mutscharunger sin und bliben sullen, So sin auch diss die verphanten und versassten Slosse und Stedde an der Loyne und in den Graveschafften und Herrschafften Cziegenhain und Nidde, und in deme andern und zweiten Teile gelegen, mit Namen Ulrichstein, das Sloiss und die Stait, und stet Sessdusent und zwey hundert Gulden, Schotten das Sloss und die Stait, und sten drittehalb dusent und sesszehen Gulden, Stormfelss das Sloiss und stet Drie dusent und sesshundert Gulden, Cleen das Sloss unsser Herrn Teil und stet zwey Dusent und zweyhundert Gulden, Hermanstein das Sloss und stet zwey hundert Gulden, ffrawenberg das Sloiss und stet Achthundert Gulden, und sin daran hundert Phunde verbuwet, Driedorff das Sloss und die stat eyn drytte Teyl und stet Dusent Gulden, stauffenberg Sloss und die Stait halb, und sten Dusent Gulden und sin hundert daran verbuwet, Aldendorff die stait und Nordecke das Sloiss und sten Funff dusent Phunt, sesshundert und vier und zwenzig Phund Heller, ffunffzig schillinge Heller und achte Heller Marpurger were, Hundert und dryssig Gulden und sin darzu zweyhundert phund an Nordecke verbuwet, Merlau des Sloss drie teil, und nit das Dorff, und darzu das Dorff Flensingen, Unser Herrn Teil sten Seszcehende halb hundert Gulden, Burgmunden an der straisse das Sloiss und Stet zwelffhundert und zwenzig Gulden, Hoemburg Sloss und die Stait, und sten vier Dusent Gulden, Landesburg das Sloss und stet Funfftehalbhundert und zcehen Gulden, Ko^enigsperg das Sloiss und stet drittehalb dusent Gulden, Burcken das Sloss und die stait halb und stet Funffhundert Gulden, Birgeln das Sloss halb und stet zu Lybe drie hundert Gulden, Nuwenkirchen das Sloss und stet zu Lybe, sunder gelt verschreben, Wolckersdorff das Sloss und Stet Funffhundert und sess Gulden, disser Iztvermelten verphanten Sloss und Stedde Summa so eyn Iglich versazt und verphant, und auch sunder Gelt zu Lybe verschreben ist wurden, brengen an eyner Summa Summarum, daran und daruff sie mit Unsern middebenometen und zugegebenden gerechent ist wurden Acht und zwenzig Dusent Funffte halb hundert und zwen und dryssig Gulden, darzu Sesstehalb Dusent vier hundert und nuhen und zwenzig Phund, Marpurger Were, disse Iztvermelten verphanten versazten und zu Lybe verschrebene Sloss Stedde, Gerichte, und gebiethe mit Irn Dorffern Auch allen und Iglichen Iren zu und inngehorungen, Renthen, Zinssen, Nuzen, Herlichkeiden und Gefellen ersucht, und unersucht, zugeben und zusezen wir obgemelten Drie Reynhart, Ebert, und Ludewig mit Irer abelosunge der Loyne, der Graveschafft zu zciegenhain und Herschafft zu Nidde dem andern und zweiten Teile, dieselben abeloisungen dann der Furste der zu denselben andern und zweiten Teil kommen werdet thun mag, Und die also widder an sich brengen, und mochten Wir denn oben dem ersten und auch dem andern und zweyten Teile zuzugeben und zuzusezen berurt haben So zugeben und zusezen Wir disse Iztvermelten verphenten Stedde und Slosse dem Lande an der Loyne der Graveschafft und der Herschafft zciegenhain und Nidde, und dem andern und zweiten Teile Also dass sie mit Irer zugehorunge und abelosunge die deme andern und zweiten Teile disser mutscharunge sin und bliben sulln mit dem das Wir hirnoch zusezen und zcugeben wulln, Und als Wir nu disse uberlegunge und Rechenschafft der obvermelten beider Teyl verphanten versazten und auch zu Lybe verschreben Slo^esse und Stedde, mit unsern middebenometen und zugegebenden gehalten und gethan han noch solicher vorbrengunge der Register oben geschreben, auch von den Jhenen den es gehoret hat, So haben Wir zusampt Wir mit Ine und sie mit Uns, die obvermelten Houbtsumen beider Teil uberleget und eyne geyn die andern abegeslagen, und ubertryt die Summe der versazten und verphanten und zu Lib verschreben Slosse und Stedde des andern und zweyten Teils die Summen, der verphanten versazten Slosse und Stedde des ersten Teils, zu Eilff dusent zweihundert Gulden sesszehen Gulden und vierzehen Behemsche, und darzu in Sestehalb Dusent vierhundert und nuhen und zwenzig Phunden Marpurger Were, und noch darzu in drihen hundert Gulden, ane Birgeln halb das zu Liebe verschreben ist, Derselben Summen, Die oben gedachten Lantschafft an der Loyne, die Graveschafft zcu zciegenhain, und die Hirschafft zu Nidde, und ander und zweyter Teile sich hoicher und du^erer lauffen und tragen, darvor sie dann auch sten versazt und verphant sin, dann die Phandeschafft des Landes zu Hessen und ersten Teils sich lauffende und tragende ist, und nochdem nu dieselben Landeschafft Graveschafft und Hirschafft des Loyne zciegenhain und Nidde, des andern und zweiten teils in disser Iztvermelter Houbtsumme, ader Phandeschafft ubertragende auch swerer und groisser ist, dann die Houbtsumme der Verphandunge des Landes zu Hessen und ersten Teyls So ist es auch das nit, desselben teils Zcinsse, Renthe, Gu^elde und Gefelle, sullen sich auch hoicher lauffen und tragen und mehr sin, dann die Zcinsse, Renthe, Gu^elde und Gefelle des Landes zu Hessen und ersten teyls, darumb Wir die auch zusampt unssern midde benometen und zugegebenden uberleigit und wie vorgerurt ist, gerechent haben und brengen Eilfftehalb hundert Gulden zwen und dryssig Gulden, nuhen wysse phennige und eynen Behemschen, Jerlicher Gu^elde, und ist hirmydde Jnne Burcken und Merlauwe geleget und gerechent wurden, Der ander und zweiter Teyl der versazter und verphanter Slosse und Stedde lauffet und treyt sich auch hoicher dann der erster Teyl in zweyn hundert und drie und dryssig Burgern, und sin die Burger von Aldendorff, Stauffenberg, und Burcken, hierjnne nit gerechent wurden, wante sie oben in die unverphanten Burgere gerechent sin, Aber in Vierdehalb hundert und vierzehen Mennern, auch inn zcweyen und dryssigesten halben Plugen, die vor sul dienen und unssern Herrn alleyne zustehen, auch in eyn und Subbenzigesten halben Plugen der Iglicher vier tage im Jahre und nit mer zu dienen pleget, auch darzu in vier und Achzig Plugen die dann allerleye Dyensten zu thunde schuldig und plichtig sin, und die eyn und Subbenzig und vier und Achzig Pluge vorgerurt, sin alle halb Solmsch, und die Mennere die zu solichen plugen gehoren sin alle ver sol geleget, als ob sie unssern Herrn alleyne zustende wern, und ist das darumb gescheen, das sie in den Registern von Jhenen den es geburet hatt, also vorgebraicht und vorgelaicht wurden sin, hyrinn so sin auch geleget und gebraicht wurden, die Nuzunge und gebruchunge der Mennere und Pluge, zu Byrgeln so viel der so birgeln widder kommen und herfallen wurde, der Herrschafft zustende ist, und Izt hennen feddeler zu syme Lybe verschreben hait, hierin ist aber geleiget und gebroicht Nuwen Kirchen das sloiss mit sinr zugehorunge so viel des Otten von gerße zu syme Liebe verschreben was, und nu Unsir gnediger Herre Lantgrave Heynrich, so viel Ime nu an andern enden mit Jerlicher Gu^elde, so lange er am Leben sin wirdet, uff Innhalt eyner Verschribinge, das Ime das bezcalet werden sal vernu^eget hat, und laufft und treybt sich solichs das Otten vorgntn zu syme Lybe fellit uff Achzig Gulden Jerlicher Gulde das Ime an denselben Slosse Nuwenkirchen verschreben was, hierjnn ist auch geleiget und gebraicht wurden, die Bethe zu Luter und Lyndenstrut, die sich dann auch Lauffit und treidt uff Dryssig Gulden Geldis Jerlicher Gulde und auch zu libe, Heinrich Steynicken und siner Huss Frauwen verschreben sin, So nu das sich disse Liebgedinge und Lybverschribunge zusampt lauffen und tragen uff hundert und zehen Gulden, und eyn und drysig Phunt und Funff Behemsche Marpurger Were, in ander Nuzunge die auch darvon fellig ist, Und ist disse vorgeschreben Lybgulde der Slosse Birgeln, Nuwenkirchen, Luter und Lindenstrut in die obgntn Summa Summarum der Eilffte halbhundert Gulden zwen und dryssig Gulden Nuhen wysse Phennign und eynen Behemsch nit gerechent, der ander und zweiter Teyl vorgerurt hat auch fast und viel eygener Lute und gotesleen darvon die Duersten zu Irn zyten fallen werden, Also hat auch der erste Teil und das Lant zu Hessen fast und viel Menner darvon dann auch zu iren zyten die Duersten fallen werden, Uff nu das der auch gedaicht und nit vergessen sy wurden, so will Uns drie des beduncken das Inn den Duersten keyne ubertrag sich finden wulle, Nochdem und dwil die eygen Lute gotesleen und Menner des andern Teyls, den Mennern des ersten Teils darvon Duerste fallen werden, woil glich sin moigen, darumb Wir dann auch daruff keynen ubertrag finden noch geschezen konnen und nochdem nu Wir drie Reynhart, Ebert und Ludewig vorgnte disse dinge vorgeschreben alle mit namen am ersten die gehalten und gethanen Rechenschafft und was sich daruss finden und begeben hat, Auch die Sazunge und machunge der Vielgemelter des ersten, und darnoch des andern und zweyten Teylere mutscharunge und mit solichen Orsachen darumb eztliche der Stedde eyns teils uff dem Lande zu Hessen genommen und dem andern und zweyten Teile zugegeben und zugesazt sin worden, auch die Verglichnisse die mit denselben Slossen und Stedden gemacht und gethan sin, und das damyt der erste Teyl also gut als der ander und zweiter teyl gesazt und gemacht ist, Auch uberdredunge eztlicher Hirlichkeiten des ersten Teyls also der Welde, der Wassere, der Dieche, der werntlichen Styffte der Clostere und Orden beyder Konne und geslechte, der Ritterschafft und Manschafft, der Slosse der Stedde und Dorffer mit Iren Festenungen und erholunge abe sie verderbit und verheret wurden, Auch mit dem Vorraide, der darjnn bass zu halten ist, mit dem Richtum der Burger, mit der schazunge und Lantsture, und mit den Wynbergen, und darzu auch mit der Erbegulde abe zuloissen, auch der Lude ie Ire guther noch irem Tode gegeben haben den Herrn, auch das der Hoiff bass zu Cassel dann zu Marpurg zu halten ist, der Biere so der Feilende wurde, zu bruwen, der Jairmerckte und der Straissen, und mit dem das sich das Hussgesynde zu Cassel bass denn zu Marpurg erhalten kann, Auch dass man eyn Iglichs zu krygen und zu keuffen bass zu Cassel dan zu Marpurg fynden mag, Auch das Forteil das der ander und zweiter Teyl vor dem Fursten des ersten Teyls, beide jn ledigen und unverphenten und auch verphanten und versazten Slossen und Stedden Gerichten und Gebieden hait, Also antreffende und berurende, dass er sine Wyne, Wurtze und Gewant bass in sin Huss das er Hoiff halden ist, kauffen furen und brengen laissen mag, Ingenommen, die auch inmaissen vorgerurt, gnu^eglich vermerckt, beschen und genzlichen zu mude und zu Herzen genommen haben, inmaissen das alles eigentlich gerurt und oben gemeldet ist, So finden und vernemen Wir, und wel uns auch nit anders beduncken, dann das der erster teyl das Lant zu Hessen, noch dissen vorgeschreben Dingen, und ubertragungen, die andern Lantschafft der Loyne ziegenhain und Nydde und andern und zweiten Teile woil ubertreden und ubertragen wel, und mag Inn Hundert Dusent Gulden Houbt Geldes dann der erster Teyl, und dem Fursten der darjnn kommen wirdet, woil nuzer besser und Fruchtberlicher noch aller siner gebruchunge syn wel, De er sich woil gebruchen kann, dann der ander und zweyter Teyl, und darumb so achten und schazen und machen und sezen Wir obgemelten Drie auch, das der Furste der in den ersten Teyl kommen wel, den Fursten der in den andern und zweiten Teyle kommen wirdet, disser Iztvermelten Summen des ubertrages zu syner Helffte, Das sin nemlich und eigentlich, Funffzig Dusent Gulden, inmaissen und Wysse hernoch geschreben, Vergnugunge geschen und gemacht, laissen werden sal, dieselben Vergnugunge Wir dann auch die beyde Iztvermelten Teil zu verglichen, sezen und machen wullen Inmaissen hirnoch folget, und dwile und nochdem dann des andern und zweyten Teils versazte und verphente Sloss und Stedde in Ire Houbt Summe darvor sie versazt und verphant sin, auch in Irer Jerlicher Gu^elde daruss fellig, Den ersten Teyl der Vorsazunge und verphendunge des Landes zu Hessen, an Burger, Mennern Plugen und Libgedingen wie vorgerurt, obertredende ist, wann dass es dann darzu qweme und sich also begeben wurde, Dass disses selben ubertrages versazte und verphente Sloss und Stedde von den Herrn beyde widdergeloist, auch die Libgedinge von Todeswegen widder kommen und herfallen wurden, Alssdann und nit ehr, so were der ubertrag vorgerurt, in sinen Jerlichen Gulden mit den Burgern, Mennern Plugen und Lybgedingen, den Herrn widder kommen, und heymgefallen, so das er dann den Herrn beider Teil geborn und zusten wolte, Uff das nu der u^ebertret, der Funffzig Dusent Gulden von den Fursten des ersten Teils des Landes zu Hessen, dem Fursten des andern und zweiten Teils wie vorgerurt zur Vergnugunge komme und darmydde etwas gemynnert, genyddert und gesmehelet, und Verglichenisse gemacht moge werden, und das man das auch mit dissem obgemelten uberdrete, der verphanten Slosse und Stedde des andern und zweiten Teyls gethun mochte, So sezen und machen Wir, das der obvermelten slosse und Stedde mit Iren zubehorungen ubertrag ganz, so viel des ist, bye dem andern und zweiten gemutscharten teyle, sin und bliben sal, so das der Furst des ersten Teils vorgerurt, daran keyne Gerechtigkeit, in disser Mutscharunge haben noch behalten sal, darent geyn, und darumb nu, so sal dem Fursten des ersten Teils, an der summe, des ubertrags, der Funffzig dusent Gulden obgerurt, zwenzig Dusent Gulden abgeslagen und hirmydde soliche Summe des ubertrages auch genyddert gemynnert und geschmehelt sin, Also blibet noch solichs ubertrages Dryssig Dusent Gulden, Uff das nu derselber ubertrag der Dryssig Dusent Gulden furter an genyddert, gemynnert, und auch darmydde vergnugend und verglicheniss wie vorgerurt moge werden, Nochdem dann die Helffte der Stedde und Slosse Lympurg Molspurg und Brechen, vormails von eynem Stiffte von Trier, der Herschafft von Hessen verphant, und vor zwey und zwenzig Dusent Gulden verschreben sin, und darnoch von Unser gnedigen lieben Herrn Vatter Loblicher gedechtnisse furter dem Edelin und Woilgeborn Graven, Bernd von Solmss, und Francken von Cronenberg den Got Gnade, vor zcwelff dusent Gulden versazt und verphant gewest, und darnoch von dem Edeln und Woilgeborn Graven Philipps zu Kazenelnbogen Unser gnedigern Herren, vor soliche Summe zwelff Dusent Gulden, von den Iztgnten Graven Bernde und Francken widder geloist sin wurden , In die Wege und Forme, dass der vorgemelte Grave Phylipps der obvermelten Stedde und Sloisse, mit Irn zubehorungen, Inmaissen sie an die Herschafft von Hessen Irst kommen und braicht sin, zu sinem Liebe, Alslange er lebet, innhaben und behalten sal, und noch syme Abescheide widderumb an die Herschafft von Hessen, Doch das soliche zwelff dusent Gulden, davor die Unser gnediger Herre von Kazenelnbogen, zu sinem Liebe geloist hat, uff Unsern gnedigen Herrn Lantgraven Heinrich und sine Erben gefallen und kommen sulln Dwile der vemelter Unser gnediger Herr von Kazenelnbogen, dem vermelten Unserm gnedigen Herrn Lantgraven Heinrich, darmyt sins Brutschazis vergnugunge gethan hat, Solichs dann auch also mit Willen folbort und verhengnisse Unsers gnedigen Herrn Lantgraven Ludewiges und auch Lantgraven Heinrichs, durchgangen und geschen ist, Inmaissen soliche Brieffe daruber gegeben das in dem stu^ecke melden und besagende sin, die Wir in Iren Crefften lassen, und nochdem nu die vorgemelten Slosse Lympurg Molspurg und Brechen mit Iren zugehorden Unsir gnedigen Herrn Vater Seliger gedechtnisse vor zwey und zwenzig Dusent Gulden verschreben sint, noch Lude der Brieffe daruber alles uff widderlossunge und die forter vor zwelff dusent Gulden von dem obgnten Unsern gnedigen Herrn Vater Seligen verschreben und versazt wurden sint, Auch alles uff Widderlosunge die ein Bischoff zu Tryer und sine Nochkommen, in den allen vorgemelten Verschribungen zuthunden behalten ist, wanne das also geschehe, so uberliessen beyden Unssern obgemelten Herrn, in disser Mutscharunge, noch zehen dusent, u^eber die zwelff Dusent Gulden die der obgntn Unsser gnedigen Herrn Vater seligen Gedechtniss vormals zu siner gnaden Handen intphangen gehabt hat, und darumb so geburte alsdann und nit ehr, Iglichem disser Vermutscharunge Teyle eynem, Funff dusent Gulden, und uff das nu der nehiste ubertrag, der dryssig Dusent Gulden, hiermydde auch genyddert und gemynnert und zu verglichenisse der beider Teile gebracht werde, so soln soliche ffunff dusent Gulden, die dann noch der abelosunge von eyme Stiffte von Tryer der Herrn eynem, der in den ersten Teile kommen wirdet, gefallen sollten, Izt dem Herrn des andern und zweiten Teils bliben, In abeslage der Dryssig Tusent Gulden und also so bliben noch des ubertrages Funff und zwenzig Dusent Gulden, und darumb nu so zusezen und zugeben Wir, dem obgerurten andern und zweiten Teile die vielgedachten Stedde und Slosse Lympurg Molspurg und Brechen, Also das sie die demselben andern und zweiten Teile sin und bliben solln, Inmaissen Wir das an dem nehisten zugesaztem zweiten Teyle zuthunde vermelt haben, wer es auch Sache das der obgemelter Unsser gnediger Herre, Lantgrave Ludewig in den andern und zweiten Teile, und Unser gnediger Herre Lantgrave Heinrich in den ersten Teyl kommen wurden, So sulte Unser gnediger Herre Lantgrave Ludewig noch Tode Unsers gnedigen Herrn von Kazenelnbogen, den obgemelten Unsern gnedigen Herrn Lantgrave Heinriche, und sin Erben die denselben Stedden und Slossen Lympurg, Molspurg und Brechen, geruwelich bliben laissen, biss so lange, das er die von Ime oder sinen Erben mit zwelff dusent Gulden brengen und loissen wurde und wann das von Unserm gnedigen Herrn Lantgraven Ludewig also gethan wurde, alssdann und nit ehr, so were Unser gnediger Herre Lantgrave Ludewig alleyn ader sin Erben, solicher abeloisunge eyns Stieffts von Trier wartende, Uff das nu aber der nehiste ubertrag der Funff und zwenzig Dusent Gulden, auch genyddert und gemynnert und zuverglichenisse der beider Teile gebraicht werde, so zusezen und zugeben Wir dem andern und zweiten Teile, den Sulinges Walt mit sinen zwen Forne Wassern, Wiltfurn und Wiltbanen und allen und Iglichen sinen Herlichkeiden und Gerechtigkeiden, zu und Inngehorungen und schezen und achten den uff achtdusent Gulden, und nyddern und mynnern darmidde den Iztvermelten nehisten ubertrag der Funff und zwenzig dusent Gulden, so das nu solichs ubertragis, Subben zehen Dusent Gulden bliben, und uff das nu solicher ubertrag der subbenzcehen dusent gulden auch genyddert und gemynnert und zu verglicheniss der beider Teile gebracht werde, so zusezen und zugeben Wir dem andern und zweiten Teile, den Habichswalt, den Langenberg, den Balhorner Walt, und den Watberg so viel der Unser Herrn zustehen, mit Irn Hirlichkeiden, Wassern und Wiltfurn und Wiltbanen, Gerechtigkeiden und zu und Inngehorungen, und schezen und achten Iztgnten Welde uff Subbenzcehen Dusent Gulden, und darumb nu so ist der obgemelter disser mutscharunge erster Teil in sinen ubertregen genzlich und gar dem andern und zweiten Teile verglichet wurden, So das nu der ander und zweiter Teil als gut ist, als der erste Teil, Uff dass nu in disse vorgeschreben Dinge alle keyn Intrag noch Irrunge fallen oder kommen moge, so sezen und machen Wir auch ab sichs also begeben wurde, das Unser gnediger Herre Lantgrave Ludewig in den andern und zweiten Teil und Unser gnediger Herre Lantgrave Heinrich in den ersten Teil kommen wurden, Wilcher Unser gnediger Herrn dann uff dem Teile daruff er kommen und den er ru^emen wurde, ezwas versazt verkaufft ader vergeben, hette, das von Irer Gnaden Vatter und Mutter uff sie kommen ist, welcher Herre das were, Das dann mit Ir beider Willen, wissen und Folbort nit durchgangen noch geschen wer, In wilchem Teile das auch sin mochte, so sulte der Herre der das gethan hette dem andern Herrn der das nit gethan hette, ader Ir eyn dem andern so sie es beide haben zustunt soliche versaze verkauffte und vergeben gutere Ir einer dem andern widderumb in sinen Teil an sinen schaden und zuthun brengen, und ab der Herrn wilcher dem soliches hirinn brengen zuthunde geboren wulte, das nit gethun kunde ader mochte so sulte alsdan derselbe Herre dem andern Herrn dem das nit geborn wulte dargeyn an andern Stedden und Slossen nach reddelichkeit und Billigkeit so viel erstadunge thun, als er versazt verkaufft ader vergeben hette, und nochdem nu auch disse hiernoch geschreben Styffte, ffolda, Hirsfelt, und Korfeye, mit Iren Landen Luten und Hirlichkeiden, der Herschafft von Hessen, und Unssern gnedgn Herrn auch zugethant und verant sin, noch Lute und Inholte eztlicher Verschribunge daruber gegeben, undt genommen, und auch dass dieselben Unsern gnedigen lieben Herrn auch eztliche mirgliche Summen Geldes, uff den Stiefften eyns Teils haben, wie dann solche verschribunge daruber und darvon ludent ist, die laissen Wir in Irer Crafft und Macht, Und sezen und machen in Macht diesserselben mutscharunge die obgemelten Unser gnedigen lieben Herrn darinn, Also dass sie beide sambt und Ir Iglich insunderheit solche Gerechtigkeit, so sie dann an denselben Stifften, noch meldunge Irer Verschybungen es were an Erbeschafft adder an der Phandeschafft haben und behalten sollen, Inmaissen die Unsir Herre Irer Gnadn Vatter seliger uff sie vererbet und gebraicht hat, hierinn ussgescheiden, Vache das Sloss und Stait, die dann in dem Teile sin und bliben sullen, inmaissen Wir die wie oben gerurt ist gesazt haben, und als nu auch Unsern gnedigen lieben Herrn, eyn fryhe Gerichte zu dem fryhenhagen zusampt dem Edelen und woilgebornen Graven Walraven von Waldecken haben, Das dann auch Unser gnedge Herr Vater seliger uff sie zur Helffte bracht hat, Uff das des nit vergessen werde, So sezen Wir desselben Gerichtes, disse Unser meynunge also, dass Wir dasselbe Frihegerichte an zwey Teile nit gemachten noch gemutscharn konnen ader mugen, Und darumb nu so sal der Stul und das fryhe Gerichte zum Fryhenhagen, vorgerurt, so viel Ine des bisshere zugestanden ist, beyder Herrn sin und bliben, und Irer keyner vor dem andern Furteils darane haben, sundern das gemeyne behalten und Iren gemeynen Richter sezen und haben, disse Unser Sazunge des Frihen stuls darumb also gesazt, und gemacht, das Uns es beduncket das solich Gerichte zuteilen nit mogelich sy, und das auch Unser gnedigen Herrn solicher Gerichte in Iren Landen keynes mehr haben, und als Wir dann in dieserselben mutscharunge in dem ersten und darnach in dem andern und zweyten teil, wie vorgerurt gesazt und gemacht haben, das ein Iglicher Hussrait in den Stedden und Slossen Ire ist, sin und bliben sal, So ist Unser meynunge, uff denselben punct des Hussrades den also und nit anders zududen nach usszulegen, Dann das vermittels demselben puncte disser hernoch geschreben, Hussrait nit darinn gezogen nach gemeynt sin nach werden sal, mit Namen alle Gulden und Silbern Wergk, und geschyrre, Gulden und Silbern, cleynade, das sy mit Edelngesteynen ader ane Edele gesteyne, das Kleynade das man nennet die Crone von Hessen, alle Buchere, Registere, Privilegia und ander Brieffe, alle geschoiss von Bu^essen und Arnbrosten und das darzugehoren ist, Und zu Felzcogen, Feltlegen und zur Were zu dienen plegit, und nochdem nu auch der anlasse obgerurt under andern stucken darmeldet und begriffen hat, das alle das Jhent das Unser gnedigen Herrn Vatter und Muter seligen gedechtniss, uff die obgemelten Unser gnedigen Hern geerbet und gebraicht hat, auch glich an zwey gemutscharet und gesazt werden sal, Und solich Gulden und silbern Werg und geschirre, Gulden und silbern Kleynode, das sy mit Edelngesteynen ader ane edele gesteyne, das Kleynode das man nennet die Crone von Hessen, die Bucher, Register, Privilegia, und andern Briffe alle geschoss vn Bussen und armbrosten, und das darzu gehoren ist, Und das zu Felzogen, Feltlegern und zur Were zu dienen pleget vor Uns nit kommen noch gebrocht sin, Und doch soliche obgemelten Kleynode auch in zwen Teile zusezen und zu machen gefordert und gesucht ist worden, So ist woil zu mercken, und davon abe zu nehmen, das Wir der obgemelten Kleynade, Sazunge und machunge an zwey Teile nit sezen noch gemachen mochten, Dwile und nochdem Unser soliche Kleynode nit zu kommen noch vorgebraicht wurden sin, Sundern Wir lassen das uff sich selbs bliben, und eynen Iglichen Herrn zu siner Gerechtigkeit stehen Inmaissen der Anlaiss darvon begriffen ist, Und nachdem nu auch Unser gnediger lieben Herrn Vatter Loblicher Gedechtnisse, schult und Plicht das man yme und sinen Erben schuldig und plichtig gewest ist, auch schult und Plicht die er und sin Erben widderumb schuldig und plichtig gewest, Und noch sin mogen, uff Unser gnedigen lieben Herrn bracht hat, Und Wir auch darinne in disser mutscharunge zwey Teile zumachen und zusezen ersucht und erfurdert sin, Alles uff Inhalt des obvermelten Puncts des obgedoichten Anlass, als das Vater und Muter uff unser gnedigen Herrn gebraicht haben sullen, So geben Wir hirmidde zu wissen und zu erkennen, Das Wir derselben Schulde und Plichte Sazunge und Machunge an zwey Teyle auch nit haben mogen thun noch machen, Der ursachen halber das uns darvon nit kundig gewest ader nach ist, Wiewole Unser gnediger Herre Lantgrave Ludewig eynen Zytdel etlicher schult vorgebracht und etliche Schriffte mydde vorgewant hat, darinn er etliche Pensie sins Brutschazs von zwelff Jaren Im zuzusezen, auch etliche Schult Unser gnedigen Herrn Vatter seligen schuldig gewest sin solle, und er bezcalit habe, darmit zusezen und auch zumachen gefurdert hait, das Wir drie dann Unserm gnedigen Herrn vorbracht haben, daruff uns dann sine Gnade eyne schryfft siner meynunge daruff zugeschicht hait, dieselben siner Gnaden schriffte Wir auch hiermit dem ubermann ubergeben han nachdem er solichen Zeiddel und die schrifft Unsers gnedigen Herrn Lantgraven Ludewigs auch bie sich behalten hait, und darumb nu so lassen Wir das in den Wegen als das in der Sazunge der vier Jar lang und des obgerurten Anlaiss zuschen den obgemelten Unsern gnedigen lieben Herrn beredit verteidingit versiegilt und virschreben sin sal, und als Wir dan auch etliche Welde uff dem ersten Teyl des Landes zu Hessen gezcogen und in den andern und zweiten Teile wie vorgerurt brocht haben, so sullen die Jhene die bissher Irer Achtwerde darjnn gehabt haben, solicher Irer Acht werde und gebruchunge, furter ane behalden, und sich der als vor gebruchende sin, was auch des obgesazten Anlaiss, ufffurunge wyder Tieffer, breider und ferrer in sich begriffen hette, das in disser mutscharunge und Sazunge nit gebraicht noch gesazt, und des auch nit gedacht wurden were, in wilchem stucke, Puncte ader Artickel das gesin mocht, und uns der zusezen und zu mutscharn Geboren sulte, ader wulte, und des nit gesazt noch gedaicht hetten, so hoffen und getruwen Wir man Uns darjnn nit vermircken noch verdencken solle, Dwil uns derselben Dinge keins vorgebraicht noch vorgelecht wirden ist, Und abe Wir auch hirjnn hernoch mails mer thun sulten, das uns geboren wulte unn wilchenn stucke das were, darjnn wollten Wir Uns auch noch zcemlichen und Billichen Dingen Bewisen und halten, so das Wir Hoffen wern, gnug gethan hetten und noch gern thun wulten, Wir haben auch in Disser Sazunge und mutscharunge des Slosses und der Stait Gudensberg nit gedaicht, und das darumb gelaissen das man in dem obgemelten Anlaisse klerlich und eigentlich uffgedrucket findet, wem und in welcher maiss, Dasselbe Sloiss zukommen und werden sail, das Wir dann auch also noch lute desselben Anlaisses sin und Bliben laissen, Darumb Uns dann auch darvon zusezen und zumachen nit geboret Hait mer denn nochdem dasselbe Sloss Gudensberg mit der stait Unserm gnedigen Herrn Lantgraven Ludewigen zu fornt und bussen disser Sazunge bliben sal, das darvon abezunemen und zu wircken ist, dass hirinn Unser gnedigen Herrn Irer Keyner von dem andern mer Furteils haben sal; Darumb Wir dann disse mutscharunge uss glichste, billiche, gesazt und gemacht ubergeben solln, Und nochdem und dwil Wir disse Unser Sazunge und machunge disser ob und vilvermelter Lantschafft des Landes zu Hessen der Graveschafft und Hirschafft zu Zciegenhayn und Nidde noch und uff Inhalt des obgedachten Anlaiss und noch Unsern Hohen und thuren eyden von Uns darzcu swerlich gethan und gesazt und gemacht haben und sich darjnn klerlich eigentlich und mirglich ganz uffenperlich findet und geschreben stet, wie die ubertrege und Furteile von Uns gerichtet geachtet und geschezet sin wurden, und an wie Hohe summe, Gulden und auch Hierwidderumb van Uns zu verglicheniss gebraicht und auch wie Hoche summe gerichtet und geachtet sin, Ab nu soliche Unser Richtunge, Achtunge und Schezunge von Jmande verachtet verrichtet vernichtiget ader verdaicht werden wulte, und uns eynicher wer der Were hierinn nit verwenen wollte inn meynunge solicher Achtunge und Schezunge nit mugelich sin sulte, ader wie des die meynunge sin wollte, des Wir doch Hoffen von keynem wissen verstendigen und vernunfftigen manne Der disse Dinge eigentlich Besynnen betrachten und versten kan und zu syne Mude und zu Herzen nehmen will geschen solle, so geben Wir eynen Iglichem dem disse Sazunge zu lesen geboren wil zu versten, Warumb und uss wilchem Grunde und Fulmont disse vorgeschreben ubertrege und Furteile von uns alles wie obingemelt also gerichtet, geachtet und geschezt wurden sin, und Wir uns der Worte Hirjnn gebrucht haben, und ist zuvernemen und zu mircken In disser selben Unser Sazunge und machunge disser obgerurten Teile, was das Jhent ist, das vor augen und an der Sonne und an dem tage liget ader nit, und auch was das ist, das mir dem gesiecht auch mit den Henden und Fu^essen usserlich fuelich und gryfflich ist ader nit, das Wir dann eynen Iglichen verstendigen dem disse Unsir schrifft vorkommen wirdet, verlaissen, so findet er das eyns Iglichen dinges gute und arge auch sin wirde und lon, als woil inn sichtigen und svelichen Dingen, als inn unbegrifflichen unsvelichen und unsichtigen Dingen inn wysongen in achtungen schezungen Wirdigungen und Richtungen allzeyt sten, sin und hangen wullen, Dwil und nochdem eyn Iglich Ding also gut und wert ist, als er des gelosen verzcyhen genyssen ader gebruchen kann, Dann sine gewisse Wirdigunge und gute alleyne Gote dem Allmechtigen unverborgen und ganz kundig und uffenbar ist, und ymanz anders sicher und gewiss maisse, gesezen kann, Darumb Wir dann soliche Achtunge Richtunge und Schezunge nit unbillich wyss gethan haben und die haben thun mussen, solten Wir anders die Sazunge und machunge uss glichste und Bru^ederlichste nach Lude des anlaiss thun sezen und machen, und sin des an zwyffel Wir inn dissen Dingen darmit ganz recht gethan, auch das richten und schazen Uns das zu thunde woile geboret habe und zulaissen nit geborn wollte, Das dann auch verstendiger vernu^enfftiger und gewissender Lude wole finden achten, richten und geschazen konnen, Den Wir das auch befeln und verlassen wollen, und nachdem und dwil Wir obgemelten drie Reynhart, Ebert und Ludewig zusampt den vorgedachten Dielen Wulffe Bernd von Hirzenrad und Herrn Johann noisz Unsirn mydde Benometen und zugegebenden, zu disser obvermelter mutscharunge Sazunge und machunge zweyer teile geordent und gegeben wurden sin, und wir Uns der auch alle semptlich angenommen und undirzogen haben, Die noch Inhalt uns usswissunge des vilgemelten und obgerurten Anlaiss an zwen zumachen und zusezen, und disserselben mutscharunge Handel und Tad, sich also begeben, und funden Haben, das Wir obgemelten Sesse der nit eynmodiglich noch eyntrechtiglich sezen und machen ko^ennen, mogen, haben, und darjnne spennig und zweiende worden sin, und darumb nu und desshalben darzu kommen, und also gefallen ist, Dass Wir drie obgemelten Reynhart, Ebert, und Ludewig dissen unsern Teyl dem ubermann eynen zufal zu thun noch lude des Anlaiss ubergeben sullen, Also haben Wir Drie obgemeltn disse vorgeschreben Dinge disser mutschar noch unser Hoisten Vernunfft Synnen Gewissen und verstendnisse, des Wir Uns zu disser Zyt nit Besser verstanden Haben vorgenommen, und darjnne der obgntn Unsir gnedigin Lieben Herrn Lantschafft mit allen Renthen Nuzungen Gefellen, Hirlichkeiden, Zugehorden und alle dem das von Irer Gnaden Vatter und Muter Loblicher Gedechtniss uff sie Braicht und geerbt, und als das vor Uns kommen ist uff das getruwelichste Bruderlichste und glichste, an zwey Teile, gesazt gemacht und gemutschart, sezen, machen und mutscharen auch geynwortiglich inn und mit crafft disser Schrifft der obgemelten Unser gnedigen Herrn Lantschafft mit Iren zugehorungen wie vorgerurt, noch unsern geloifften und eyden Wir darzu und daruber gethan Haben, mit folge und u^ebergebunge so Wir disse vorgeschreben Dinge an den ubermann, nemlich an den Vesten Boden von Boddenhusen, an stait Hermann Meysenbughs dem Got Gnade Brengen und noch Inhalts des Anlaiss kommen lassen sollen, und darumb nu so brengen und ubergeben Wir disse vorgeschreben Unser Sazunge, Machunge und Mutscharunge, dem obgemelten Boden von Boddenhusen als dem ubermann eynen Zufal zuthun, noch Lude und Innhalt disses obgerurten Anlaiss und Innmaissen er darzcu von dem obgemelten Unsern gnedigen lieben Herrn erwelt, Darzcu gebraicht und kommen ist, Und des zcu Orkund so haben Wir Reynhart von Boyneburg, Ebert von Waldensteyn und Ludewig von Sassen unser Iglicher sin eigen Ingesiegel an Iglich Blad besundern disser Schrifft kuntlich und wissintlich gedrucht, die dar gegeben ist uf den Mitwochen noch Sancti Egidyetage Anno Domini Millesimo quadringentesimo Sexagesimo Sexto.

Language of the Original Text

deutsch

References

Text Basis

Document Particulars, Regestum

Demandt, Regesten 2.1

Original

Kopp, Bruchstücke

Citation

Landgrafen-Regesten online Nr. 12002 <https://www.lagis-hessen.de/index.php/en/subjects/idrec/sn/lgr/id/12002> (Stand: 09.05.2026)