Bündnis zwischen Landgraf Ludwig I. und Göttingen

Regest-Nr. 9128

Überlieferung | Regest | Originaltext | Nachweise | Textgrundlage | Zitierweise

Überlieferung

Ausfertigung:	Stadtarchiv Göttingen, Urkunde, Nr. 451. Pergament mit Stockfelecken, Siegel anhängend.
Drucke:	Armbrust, Göttingens Beziehungen , S. 118 f. Nr. 159.

Regest

Landgraf Ludwigs Verspruch mit der Stadt Göttingen.

Originaltext

Wir Ludewig, von gotis gnaden lantgrave zcu Hessen, bekennen und thun kund mit diesem unserm uffin brieffe allen luten, die en sehin adir horen lesen daz wir umbe fredde der lande und umbe sunderlicher gunst und fruntschafft willen, so wir dan han zcu den ersamen wiisen luten ratismeistern, raide und ganczir gemeynde zcu Gottingen, unsern guten frunden, uns mit denselben raide und ganczer gemeynde zu Gottingen vireyniget und zcu yn gethan han, vireynigen und thun uns zu yn geinwurtiglich in und mit crafft diesis brieffis zcehin jar, die uff datum diesie brieffis angehin und nehst nacheynandir folgen soln. Also weres, daz ymand dieselben von Gottingen die iren adir die jhenne, die yn im rechten zu virsprechen und zu virantwurten stunden, bynnen solicher zciit ane fhede und unvirwart angriffen, beschedigen und uff sie suchen wurde, und sie uns adir die unsern umbe nachfolge zu beschuddenge aneruffen und eisschen, adir sust wir und die unsern solichs inne und gewar und des nicht zu beschudden von yn virmanet wurden, so soln und woln wir und die unsern, die des so von yn virmanet, geheisschet adir zu wiisßen worde, yn daz weren, entschudden und uffhalden helfen nach unserm besten virmugen, desglich sie und die iren uns und den unsern und den jhennen, die uns zu virantwurten stehin, auch widderumb thu^en soln ane geverde. Weres auch, daz ymand mit denselben von Gottingen zcu fheden und zu virwarungen quemmen (!), daz sollten sie uns wiisßen lassen, wanne wir irer dan gein dieselben, die so mit yn zu fheden quemmen, zu eren und zu rechte mechtig woren, soln und woln wir vor sie schreiben und ere und recht vor sie bieden. Muchte daz dan nicht gehelffen, und daz sie die jhenne ye poben ere und recht, und daz wir irer darzu auch mechtig weren, in solichen fheden auch angriffen wollten, so sollten und wollten wir zustund virwarunge thun an den jhennen, die ere und recht an den von Gottingen virslugen und daz dan von yn nicht nemmen und thun wollten, und mit den unsern daz abir dan helffen weren und beschudden, in masßen dan vorgeschrebin sted, doch ußgescheiden die jhenne, mit den wir vor datum diesie brieffs in virschribunge sesßen, ane geverde. Und ab wir und die unsern uff solicher jacht und entschuddinge eyniche gefangen reysige habe adir andir nemme greffen und gewonnen, die wir mit eren nicht behalden, sunder von ere wegen widder gebin musten, des soln wir mechtig sin, darin uns auch die von Gottinhen adir die iren nicht legen soln, auch ane geverde. Es ist auch sunderlich beredt: weres, daz wir adir die unsern mit den jhennen, die die von Gottingen und die iren also in vorgerurter masße angriffen wurden, von solicher entschuddinge und nachfolge wegen, die wir und die unsern yn theden, auch zu fheden und unwillen quemmen, so sollten diesemben von Gottingen und die iren, des dan auch soliche fhede gancz uß bii uns und den unsern bliben, uns getruwelich nach irem besten virmugen uff dieselben behulffen sin und sich des von uns in keyne wies nicht scheiden, biiß so lange daz soliche sache ußgerichtet und zu ganczem ende und fredde bracht worde. Desglich wir uns von yn, abe sie unserenthalben von entschuddinge und nachfolge wegen, die (sie) uns und den unsern thunde wurden, mit ymande zcu fheden und unwillen quemmen, auch nicht scheiden woln, alle argeliist und geverde herinne genczlich und zu^emal ußgescheiden. Und des zcu urkunde han wir unser ingesigel heran thu^en hengken.
Gebin am sonnabinde nehst nach dem heilgen Crist tage, sub anno domini millesimo quadringentesimo quadragesimo primo.

Sprache des Originaltextes

deutsch

Nachweise

Weitere Personen

Hessen, Landgrafen, Ludwig I.

Weitere Orte

Göttingen, Stadt

Sachbegriffe

Bündnisse · Hilfe, militärische · Gefangene · Fehden

Textgrundlage

Stückangaben, Regest

Armbrust, Göttingens Beziehungen

Zitierweise

Landgrafen-Regesten online Nr. 9128 <https://www.lagis-hessen.de/index.php/de/subjects/idrec/sn/lgr/id/9128> (Stand: 28.05.2026)