Regesten der Landgrafen von Hessen

Erweiterte Suche »
Ergebnismenge »
Treffer 10 von 54

1450 Januar 6

Endgültiger Entscheid im Familienstreit der Grafen von Henneberg

Regest-Nr. 9230

Überlieferung

Drucke:	Hennebergisches UB 7, S. 242/243 Nr. 294.

Regest

Schmalkalden. - Graf Georg von Henneberg entscheidet endgültig die zwischen seinen Vettern, dem Grafen Heinrich von Henneberg, an einem und den Grafen Wilhelm, Johannes und Berthold von Henneberg am andern Theile schwebenden Irrungen.

Originaltext

Wir Jorge, von gotis gnaden Graue vnd herre zcu Hennberg, Bekennen vnd thun kund mit diesem briue allermenclichen, Als die hochgebornen fursten vnd herren herre Friderich vnd herre Wilhelm, herczogen zcu Sachsen etc., herre Albrecht, margraue zcu Brandenburg, vnd herre Ludewig, lantgraue zcu Hessen, vnsere liebin herren, zwischen den wolgebornen Heinrichen eynes, Wilhelmen, Johannsen vnd Berlaten, gebrudere, alle vire Grauen vnd herren zcu Hennberg, vnsern liebin vettern des andern teyls durch sich selbst vnd auch die jren etliche gutliche uszspruche vnd schiede zcu Slusungen vnd zcu Vache bethedingt, uszgesprachen vnd des jglichem teyle schydesbriue gegebin habin vnd als sich nu furder usz den vorgemelten uszspruchen auch sind sulchen schydungen zwischen den vorgemelten partyen beden vnsern vettern von Hennberg stat zcuspruche vnd vnwillen gemacht vnd begeben habin, habin wir vorgenanter Graue Jorge sulche vnfruntschaft vnd vnwillen nicht gerne zwiszen jn gesehen vnd vns vnderstanden, gutlichen darjnne zcu thedingen, han vns so fliszeclichen darjnne beerbeit, das wir von beyden teyln erlanget habin, so das sie zcu beder syte suliche vorgemelte czuspruche vnd gebrechen jn gutlichkeit off vns gestalt vnd geseczt habin, wie wir sie darumb jn fruntschafft scheiden, das sie esz halten vnd dem gancz nachkomen wollen. Sulchs haben wir zcu vns genomen, sie gutlichen vnd fruntlichen geseczt vnd geschyden, als hernach geschriben stet.
Zum ersten scheiden wir jn gutlichkeit also, das vnser vetter Graue Heinrich die spruche nemlichen von der dorffer wegen Bettenhusen, Kaldenlengsfelt, Sewe vnd alle andere spruche, was der geweszt vnd wie die genant sind, die er sind der gutlichen scheydunge obgemelt wannen bisz off diesin hutigen tag zcu den obgenanten vnsern vettern von Hennberg gehabt had, keyns uszgenomen, gancz vnd gar bie vnd abethun sal vnd er nach nymand von synen wegen angeuerde sollen suliche spruche alle nach keynem besundern an den vorgenanten vnsern vettern nu furbasz merere ewiclichen nymer furgeczihen, uffrocken nach fordern in keyne wise slechtlichen angeuerde. Desglichen sollen auch die obgenanten vnsere jungen vettern von Hennberg alle jre spruche, was der gewest vnd wie die genand sin, die sie sind der gutlichen schydunge obgemelt wannen bisz off diesin hutigen tag zcu dem genanten vnserm vettern Grauen Heinrichen gehabt haben, an demselben vnserm vettern nu furbas mere ewiclichen nymmer furgeczihen nach fordern jn keyne wiese auch angeuerde. Esz sollen auch vnsere jungen vettern von Hennberg dem genanten vnserm vettern Grauen Heinrich sin lebetage vnd nicht lenger die mollen zcu Kaldenlengsfelt vnd jren czehenden zcu Wolmathusen glich jgliches getredes, als er jn gefellet, alle jare, wann sich geburet den jn zcunemen, falgen vnd werden laszen, das er sich desterbass enthalden muge, vnd er sal doch suliches halben czendes vnd die mullen nicht uerseczen, uerkeuffen nach vorkomern jn keyne wise, sundern wannen der genante vnser vetter Graue Heinrich von todis wegen abgegangen ist, sal sulicher halbe czende vnd die mollen den genanten vnsern jungen vettern, jren erbin vnd herschafft ledeclichen wider heym fallen an jntrag allermenclichs.
Das nun auch die obgenanten vnsern vettern beyde partie hin furbass dester einnyger vnd fruntlicher gesien vnd blieben mugen, han wir einen usztragk zwiszen jn gemacht vnd bethedingt also, were esz sache, das vnser vetter graue Heinrich von Hennberg von hute dato diczs briues anczuhyben vnd nu furbas mere icht gebrechen, spruche oder forderunge zcu den genanten vnsern vettern gewonne, Das sal er vns grauen Jorgen als eynem obmanne, als sie vns von beyden teylen darczu gekorn habin oder nach vnserm tode, ab sichs so geburet, vnserm liebin sün Grauen Friedrichen, den sie auch also nach vns zcu eynem obmanne gekorn habin, schreiben vnd bithen, jm tage zcu seczen vnd von vnsern jungen vettern rechtes zcu helffen. Sollten wir oder nach vns der genante vnnser Sun also zcu stund jn eynem manden vngeuerlichen, so wir darumb ermand wern worden, beden obgemelten teyln gein Münerstad oder Romhilt tage bescheiden, off sulichen tage sollten vnser jungen vettern vnnserm vettern Graue Heinrichen vmb sin sprüche, die er also jn vorgeschribener masze zcu jn meint zcu habin, off zwen die jren, die sie darzu gebin, vnd off zwen der sin, die er darczu geben wurden, vnd off vns als eynem obmanne oder nach vns off Grauen Friderichen vnsern Sun rechtes pflegen vnd nicht uszgehen. Vnd abe vnsere jungen vettern sulichen nicht theten, das weygerten oder ob icht von vns sampt den viren zcu recht gesprachen oder von vns als eynem obmann eyn mererteile gemacht oder von vnserm Sun Grauen Friderichen jn sulicher masze gethann wurde, eyns sulichen gesprachen rechten nicht hilten vns vorbrechten, So sollten sie das dem genanten vnserm vettern Grauen Heinrich mit Thusind gulden vorbuszen vnd vorpenen vnd jm die jn eyner jares friste darnach, als suliches gescheen were, beczalen, vszrichten, vnd keyne uszuge darjnn suchen jn keyne wise an alles geuerde. Vnd suliches alles sal gescheen, als offt des nod geschiet. Gewonnen auch vnser jungen vettern von Hennberg von hute dato diczs briues anzcuheyben vnd nu furbasz mere icht gebrechen, spruche oder forderunge, wie die oder was der wern, zcu vnserm vettern Grauen Heinrichen, Das sollen sie vns oder abe esz sich so mechte, vnserm Sun grauen Friderichen auch jn vorgeschribner masze schreiben. So das also geschee, sollten wir jn auch an der obgenanten stete eyne vnd jn egeschribener masze tage bescheiden. Sollte vnser vetter graue Heinrich vnsern jungen vettern vmb jre spruche, die sie also jn vorgeschribener masze zcu jm theten vnd meynten zcu haben, off zwene, die vnser vetter graue Heinrich der sin darczu, uff zwen der jren, die sie darczu gebin wurden, vnd off vns als eynem obmann oder nach vns off grauen Friderichen egenant rechtes pflegen vnd nicht uszgehen. Vnd ob vnser vetter graue Heinrich eyns sulichen nicht thete, das weigerte oder abe icht von vns mit sampt den viren zcu recht gesprachen oder von vns als eynem obmann eyn merer teyl gemacht oder von vnsern Sun graue Friderichen jn sulicher masze gethann wurde, eynes sulichen gesprachen rechten nicht hilt, dem nicht genuck tete vnd das vorbracht, So solt er das vnsern jungen vettern auch mit Thusind gulden vorpenen vnd vorbuszen. Dieselben thusind gulden sollten vnsern jungen vettern jn dreyen jaren schirst nach einander falgende an dem lipgedinge, so sie dem genanten vnserm vettern Grauen Heinrichen jerlichen schuldig vnd pflichtig sin, abgehen, abgeslagen, auch vnserm vettern grauen Heinrichen dieselben drye jare gancz nichts fur sin lipgedinge gegeben werde, dann alleyne jm dritten jare sollten sie jm off die leczsthen tageczit die uberigen funffczig gulden an jnlegunge heruszgeben vnd solt auch vnser vetter Graue Heinrich dieselben dry jare sin burgen, die er fur sulich lipgud had, nicht manen nach czu manen habe, die burgen jm auch, ab er sie mante, nicht pflichtig sie zcu halten dieselben drye jare, vnd wann dieselben drye jare jn yczund geschribener masze vmb sin, sollten jm vnsere jungen vettern sin lipgud wider gebin jn maszen als vor, alle geuerde hirjnne gancz hindan geseczt.
Vnd dicz alles, wie jn diesen artickel berurt ist, sal gescheen, als offt des not geschiet, auch slechtlich angeuerde. Vnd hiruff sollen alle czwitracht, spenne, jrrunge vnd vnwiln, die sich zwiszen beden obgemelten partyen vnsern lieben vettern wannen bisz off diesin geinwertigen tag uerlauffen vnd gemacht haben vnd allen, die darvnter vordacht vnd genant sin angeuerde, gutlichen vorricht, geslicht vnd abe sin vnd sich ein partie kein der andern fruntlichen vnd gutlichen halten an allis geuerde. Vnd wir obgenanter Jorge, graue vnd herre zcu Hennberg, Bekennen, das wir alle dies vorgemelten sache vnd stucke zwiszen den egemelten vnsern vettern beretd vnd bethedingt haben, Gereden auch fur vns vnd vnsern liebin Sun, grauen Friderichen, jn crafft discz briues, das wir nach uszwisunge des usztrages hirjnnen gemelt beiden teylen vnuerczugelichen tage zcu recht seczen vnd sie mit recht nach jnnhalt diczs briues entscheiden wollen, wannen wir des vormand werden vnd wie offt des not geschied an allen uerczugk angeuerde. Zcu urkunde ist vnser sigille fur vns vnd vnsern lieben Sun grauen Friderichen an diesen briff mit wiszen gehangen. So bekennen wir Heinrich graue zcu Hennberg, das diese beredung vnd bethedigung mit vnserm wiszen, willen vnd vorhengnisze gescheen ist, sollen vnd wollen auch diesen briff mit allen synen stucken, ounckten vnd artikeln gancz stete, veste vnd vnuerbrochlichen halden, kein jnlegunge darjn thun nach kein wegerunge oder uszuge darjnn machen nach furnemen in keyne wise, wie jmands die erdencken mocht, als wir dann das dem genanten vnserm vettern Grauen Jorgen mit hantgebendem truwen an eynes rechtes eydes stad liplichen an sin hand gelobt haben. Des zcu waren urkunde ist vnser jngesigel fur vns an diesin briff gehangen. So bekennen wir Wilhelm, graue zcu Hennberg, fur vns Johannsen vnd Berlten, vnser brudere, das diese beredunge vnd bethedigunge mit vnserm wiszen, willen vnd vorhengnisse gescheen ist, sollen vnd wollen auch diesen briff mit allen synen stucken, punckten vnd artikeln gancz, stete, veste vnd vnuerbrochlichen halden, kein jnlegunge darjn thun nach kein weygerunge nach uszczuge darjnn machen nach furnemen in keyne wise, wie jemands die erdencken mocht, als wir Graue Wilhelm das fur vns vnd vnser brudere obgenand dem genanten vnserm vettern Grauen Jorgen mit hantgebenden truwen an eynes rechten eydes stad liplichen an sin hand gelobt han. Des zcu bekentnisz ist vnsers Grauen Wilhelms jngesigel fur vns vnd vnser brudere an diesin briff gehangen.
Gescheen vnd gegebin zcu Smalkalden an der heilgen dry konige tag nach gotis geburt virczenhundert jare vnd darnach jn dem funffczigisthen jare.

Sprache des Originaltextes

deutsch

Nachweise

Textgrundlage

Stückangaben, Regest

Hennebergisches UB 7

Original

Hennebergisches UB 7

Zitierweise

Landgrafen-Regesten online Nr. 9230 <https://www.lagis-hessen.de/de/subjects/idrec/sn/lgr/id/9230> (Stand: 23.04.2024)