Hermann II. schuldet dem Erzbischof von Mainz 20.000 fl.

Regest-Nr. 1695

Überlieferung | Regest | Originaltext | Nachweise | Textgrundlage | Zitierweise

Überlieferung

Ausfertigung:	Staatsarchiv Marburg, Cel. 1578, Nr. 738, z.T. zerlöchert.
Drucke:	Friedensburg, Hermann II., Anh. Nr. 11, S. 257-261.

Regest

Landgraf Hermann von Hessen bekennt dem Erzbischof Adolf von Mainz als Ersatz für Kriegskosten zwanzigtausend Gulden schuldig zu sein, welche er bis künftige Weihnachten bezahlen oder seine Schlösser und Städte Grebenstein, Immenhausen und Wolfhagen dafür einsetzen soll.

Originaltext

Wir Herman von gots gnaden lantgrafe zu Hessen bekennen fur uns und unser erben und nachkomen an dem lande zu Hessen und du^en kund offenlich mit diesem brieffe allen den die yn sehent odir horent lesen, daz wir deme erwirdigen in gote vater und herren hern Adolff erczbischoff zu Mencze des heiligen Romeschen ryches in Dutschen landen erczcanceler sinen nachkomen und deme stiffte zu Mencze recht und redelich schuldig sin und gelten sollen zwenczig dusent guldin gut von golde und swer gnu^eg von gewichte, die wir unser erben und nachkomen an dem lande zu Hessen deme vorgenanten unsern herren hern Adolff erczbischoff zu Mencze sinen nachkomen und deme stiffte zu Mencze gelden und bezalen sollen zwischen hie und wyennachten nest ku^enfftig nach data dieses brieffes unverzogenlich ane geverde, und sollen die bezalungen tůn und die zwenczig dusent guldin antwerten zu Friczlar oder zu Geysmar, in welicher der stete eyner sie wollen, in des obgenanten unsers herren Adolffes siner nachkomen und stifftes sicher behalt. Und des zu merer sicherheid so haben wir deme vorgenanten hern Adolffen sinen nachkomen und stiffte zu Mencze zu underphande geseczet und seczen geinwertlich mit diesem brieffe diese nachgeschrieben unser slo^eße Grefenstein burg und stad Ymmenhusen burg und stad und Wolffhayn burg und stad, die wir auch daruff yngegeben und bevolhen haben unsern lieben getruwen Wernher von Falkenberg rittere und Fryderich von Hertyngeshusen, den auch alle unser manne burgmanne burgermeistere die rete und burger gemeinlichen an des obgenanten unsers herren von Mencze siner nachkomen und sines stifftes zu Mencze stat globen hulden und zu den heiligen sweren sollen zu gewarten und gehorsam zu sine, mit solichem underscheide: wer’ es sache daz wir unser erben oder nachkomen an deme lande zu Hessen deme vorgenanten unserme herren Adolff erczbischoffe sinen nachkomen und stiffte zu Mencze die vorgenante summe zwenczig dusent guldin zwischen hie und der vorgenanten zyt an der stete eyne und in der maße als vor geschrieben stet nit richten und bezalten, so sollen die vorgenanten Wernher von Falkenberg rittere und Fryderich von Hertyngeshusen die obgenanten unser burge und stete mit iren zugehorungen deme vorgenanten unserme herren Adolff erczbischoff sinen nachkomen und stiffte zu Mencze yngeben und ynantwerten unverczogenlichen, also daz der vorgenant unser herre von Mencze sine nachkomen und stifft zu Mencze die obgenanten burge und stete mit allen iren zugehorungen gerichten rechten nuczen renten und gefellen mannen burgmannen burgern und gemeynden und mit allen andern zugehorungen ersucht und unsersucht ynnehaben nuczen und gebrauchen sollen ane abeslag, und sollen auch alle unser manne burgmanne burgere und gemeinde der obgenanten unser burge und stete deme egenanten unserme herren von Mencze sinen nachkomen und stiffte zu Mencze oder wenn sie daz bevelhen dann selber von nuwens globen hulden und zu den heiligen sweren zu gewarten und gehorsam zu sine als lange biz wir unser erben oder nachkomen an deme lande zu Hessen die obgenanten unser burge und stete mit iren zugehorungen umbe die obgenant summe zwenczig dusent guldin von deme egenanten unserme herren von Mencze sinen nachkomen oder stiffte wider gelosen in der maße als vor geschrieben stet . und wann wir unser erben oder nachkomen an deme lande zu Hessen die losunge tun wollen, daz sollen wir unsern egenanten herren Adolff erczbischoff sine nachkomen oder stifft zu Mencze eyn virteil jares vor laßen wißen und verkundigen mit unsern offe nbrieffen . auch wer’ es sache (da got fur sy) daz die obgenanten Wernher von Falkenberg ritter oder Fryderich von Hertyngeshusen sie beyde oder ir eyner von dodes wegen abegingen gefangen wurden oder ußer lande furen oder vor libes noit des nit gewarten mochten, ee dann deme obgenanten unserme herren Adolffe sinen nachkomen oder stiffte zu Mencze die vorgenanten unser burge und stete yngeantwertet wurden, so sal Conczman von Falkenberg an des obgenanten Wernhers stat und Hans von Flakenberg zu^er Denspurg an des egenanten Frideriches stat die obgenanten unser burge und stete ynnehaben und die auch unserme egenanten herren Adolff erczbischoffe sinen nachkomen und stiffte zu Mencze, ob die zwenczig dusent guldin hie zwischen und der obgenanten zyt nit bezalt wurden, ynantwerten und yngeben in der maße als vor begriffen ist, und sollen yn auch alle unser manne burgmanne burger und gemeinde der obgenanten unser burge und stete iczunt mit Wernher von Falkenberg rittere und Fryderich von Hertingeshusen globen und hulden und zu den heiligen sweren zu gewarten und zu tůne in alle der maße als vor geschrieben stet . und weliche zwene von den vieren die vorgenanten unser burge und stete also ynnehaben, die sollen unserme herren adolff sinen nachkomen und stiffte zu Mencze gewarten und gehorsam sin die yn ynzuantwerten und zu tu^ene in aller maße als vor begriffen ist und geschrieben stet und sal daz ir eyner uff den andern nit vercziehen . darumbe so heißen und gebitten wir allen unsern mannen burgmannen burgern und gemeinden der obgenanten unser burge und stete daz sie globen hulden und zu den heiligen sweren tu^en und halden in alle der maße als davor geschrieben stet . und waz sie in den obgenanten sachen tůn, daz sal ane allen unsern unser erben und nachkomen an dem lande zu Hessen zorn und widerwillen sin ane alle geverde . auch sollen wir unser erben oder nachkomen an deme lande zu Hessen keynen fund nummer fynden geistlich oder werntlich, wie man daz erdenken mag, daz dem vorgenanten unserme herren Adolff sinen nachkomen oder stiffte zu Mencze an der vorgenanten summe gelts oder an unsern vorgenanten burgen und steten als vor geschrieben stet zu schaden oder hindernis reichen moge in dheine wise ane alle geverde . auch wann wir die wyderlosung tůn wollen so sollen geleide haben mit dem gelde und sicher sin gein Friczlar oder gein Geismar wo die bezalunge gescheen sal und wyder heym von unserme herren von Mencze sinen nackomen und dem stiffte und allen den die durch iren willen tůn und lassen wollen ane alle geverde . auch sal der vorgenant unser herre von Mencze sin stifft und capitel und nachkomen unser vorgenant burgmanne und burger by allen iren rechten fryheiden und gewonden bliben und behalden laßen in alle der maße als sie by uns und unsern aldern herkomen sin ane alle geverde . des zu urkunde und daz alle vorgeschrieben stucke puncte und artikel sementlich unde besundern stete und veste und unverbrochenlichen gehalden werden, so haben wir unser ingesiegel fur uns unser erben und nachkomen an deme lande zu Hesse nan diesen brieff gehangen, der geben ist uff sant Marien Magdalenen tag nach gots geburte druczehenhundert jar und darnach in deme funff und achczigesten jare.

Sprache des Originaltextes

deutsch

Nachweise

Weitere Personen

Hessen, Landgrafen, Hermann II. · Mainz, Erzbischöfe, Adolf I. von Nassau

Weitere Orte

Grebenstein · Mainz, Erzbischöfe · Immenhausen · Wolfhagen

Sachbegriffe

Erzbischöfe · Kriegskosten · Auseinandersetzungen, mit Mainz · Schulden · Zahltermine · Städte · Schadensersatzleistungen

Textgrundlage

Stückangaben, Regest

Friedensburg, Hermann II.

Original

Friedensburg, Hermann II.

Zitierweise

Landgrafen-Regesten online Nr. 1695 <https://www.lagis-hessen.de/de/subjects/idrec/sn/lgr/id/1695> (Stand: 19.04.2024)