Regesten der Landgrafen von Hessen

Erweiterte Suche »
Ergebnismenge »
Treffer 14 von 164

1375 Oktober 26

Landgraf Hermann II. erhebt eine Steuer in Marburg

Regest-Nr. 11735

Überlieferung

Ausfertigung:	Staatsarchiv Marburg, Generalrepertorium.
Stückbeschreibung:	Pergament, durch Moder beschädigt.
Siegel:	Siegel fehlt.
Drucke:	Küch, Rechtsgeschichte Marburgs 1, S. 105-108, Nr. 42.
Regesten:	Wenck, Hessische Landesgeschichte 2, UB, S. 449 Anm. 1 (Auszug), nach dem Exemplar für Grünberg (mit Datum 1375 November 2); Küch, Rechtsgeschichte Marburgs 1, S. 105 Nr. 42.

Regest

Landgraf Hermann II. setzt ein Ungeld in Marburg ein.

Wortlaut der Datierung

Diis zu orkunde so han wir lantgrave Herman vorgenant unsir furstlich ingesigel an dysin bryff laßin henckin, der gegebin ist noch Christi gebort drytzenhůndert jar, darnoch in deme vůnffundesebintzigestin jare an dem nestin frytage vor Symonis und Jude der heylgin apostlen.

Originaltext

Wir Herman von gotz gnadin lantgrave zu Hessin bekennen uffinliche an dysem bryve vor uns unde unsir erbin, daz wir mid gunst ,willen unde vorhengnysse unsir stede habin gesatz eyn ungelt zu stůre unsir schult unde insirs landis nod, die uns entstandin ist unde hirnoch entsten mag, alse hirnoch geschrebin sted.
1. Czu dem erstin han wir zu Marpurg unde waz in dy pharre daselbis gehort, gesatzt, daz man uns von weyße, korne unde gerstin sol gebin y^e bon eynem maldir eynem thornos zu malende, y^e von eynem maldir habern tzehin heller zu malende zu ungelde. Item wer ouch uß der egenanten stad Marpurg weyße, korn adir gerstin fůrit, die he gekoyft adir entnummen had, der, die daz also gekoyft adir entnummen had, sal uns y^e von eynem maldir gebin eynen thornos unde von eynem malder habern tzehin heller. Item sal man uns y^e von eynem maldir girstinmaltzis gebin eynen thornos unde von eynem maldir hebernmaltzis tz(eh)in heller. Item sal man uns y^e von eynem halbin wynes, daz man in der egenanten stad schenckit, gebin eyn heller unde von eyme stobichin byres, daz man scheinkit, eyn heller. Item furit abir ymant win adir bier uß der egenanten stad, der sal ouch gebin von eyme halbin wynes eyn heller unde von eyme stobichin bieres ein heller noch deme, alse die ame ußwysit, unde sal darzu die egenante stad er alde ungelt behaldin, als sii daz bizhere gehat habin. Item von dem fleysche, daz man zu den schirrin vorkoyft, sal man uns gebin y^e von der ku^e vier schillinge heller, von eyme styre vier schillinge heller, von eyme ossin vier schillinge heller, y^e von eyme feyßtin swyne, daz man zu smeltzfleysch gemachit had, vier schillinge heller unde von eyme magerin swyne, daz man mid der swartin vorkoyft, einen thornos, von eyme hamele eyn schilling heller, von eyme schaffe eyn schilling heller unde von eyme kalbe seß heller. Item wer vortrybit stogfysch, hering, bocking unde gesaltzin thunnenfysch, der sal uns gebin y^e von hůndert stogfysschin, daz man heyßit recfysche dry thornose, y^e von eyner thunnen heringez adir gesaltzin thunnenfyssche tzwene thornose unde (y^e von) eyme stro buckingez tzwene thornose. Item von den tuchin, die in dysem egenanten sloße gemacht werdin, sal man uns gebin, wer die machit, y^e von eyme tuche eynen thornos, koyffit sii abir ymant unde vorsnydit sii, der sal uns oych y^e bon eyme tuche ein thornos gebyn. Wer abir gewant von Brafant, Ache adir Kolne brenget in dyse egenante stad unde vorsnydit adir vorkoyfr daz, der sal uns gebin y^e von eyme tuche tzwene thornose, unde waz lantuch vorsnedin adir vorkoyft werdin, davone sol man uns y^e von eyme tuche ein thornos gebin. Item waz wollin in der egenanten stad vorkoyft unde enweg gefurd wirt, davon sal man uns gebin y^e von eyme cluder eyn thornos, unde den sal halp gebin der vorkoyffir unde halp der koyffir. Wer abir sine eygin wollin enweg furit, der sal uns y^e von eyme cluder gebin tzehin heller. Item wer eyn Czentener wasses vorkoyft, der sal uns gebin y^e von eyme czentener tzwene thornose. Item von koppher, cz(inn), myssinge, ertze und bly^e sal man uns gebin y^e von eyme czentener eyn thornos, wer den vorerweydit. Ist ez abir, daz man en wegfurit unvorerweydit, so sal uns der, der en enweg furit, y^e von eyme czentener gebin eyn thornos. Item von smaltze, smere, alune unde rotin, waz man des vorkoyfft, des die wollinwebere zu erne hantwerke nicht enkoyfftin, davone sal man uns gebin y^e von eyme czentener eyn thornos, unde den sal halp gebin der vorkoyffir unde halp der koyffir. Item wer da koyffit eyne thunnen h(eringe) unde die vortrybit, der sal uns y^e von eynir thunnen gebin tzwene thornose. Item wer lynwot enweg fůrit, der sal uns gebin y^e von eyme hůndert flessenir lynwot eynen schilling heller unde von eyme hůndert wer(kenir) lynwot achte heller zu dem aldin czolle. (Item w)ilch gast eyn gebunt ysens vorkoyft, der sal uns gebin y^e von eyme gebunde vier heller zu dem aldin czolle. Item wer ouch vorkoyfft eynen czentener stahelz, der sal uns gebin y^e von eyme czentener tzwene thornose. Item wilch gast rocke adir siitledir vorkoyft, der sal uns gebin y^e von eyme rocke sez heller unde von eyme par siitledirz dry^e heller, unde waz man schaiffledirz vorkoyft, davone sal man uns gebin y^e von eynir hu^eyt dry heller. Item von eynir ruchin schaffizhůd, wer dy vorkoyfft, der sal uns gebin y^e von eynir hu^ed ein heller, unde waz rindes-, ossin- unde pherdeshude die lowere gar machin, davone sullin sii uns gebin y^e von eynir hud vier hellir, von eyme kalpfelle eyn heller, von eyme bogfelle ein heller, von eyme schaffelle eyn heller unde von eyme czeginfelle eyn heller. Item wilch gast vorkoyft eyn faß salsmerz, der sal uns gebin y^e von eyme faße dry thornose.
2. Ouch han wir unser egenanten stad zu Marpurg die gnade gethan daz wir diit ungelt, als vorgeschriben sted, nicht hoen wollin.
Ouch sullin sii allir bede loß sin, die sii bizhere der herschaff gegebin habin, daz sii der nicht mer gebin sullin, sii losin sii adir werde selber loß. Ouch enwollin wir en keyne stu^ere noch bede mer heyschin, odir sii mid kein stockin darzu koer dryngin, ußgenummen ob die herschafft sloße koyfftin, die unserme lande unde en selbes nu^etze werin, adir sulche nod daz lant rurte, daz wir von unsir schar, die wir von unsirme ungelde jerlichis habin, die nod nicht entstryckin kůndin, adir abe die herschafft kint berydin, da andirz unsir lant gemeynlichin zu hulffe, da suldin sii oych zu helffin noch er můge.
Ouch wollin wir sii by gudir aldin gewonheyt laßin, als sii by der herschafft biz her bracht habin.
5. Oych vortmer wer mid en scheinkit, koyffit unde vorkoyfft, sii sin geystlich adir werntlich, die sullin er ungelt gebin unde mid en schoßin unde bedin glichirwys alse sii.
6. Wer oych, daz wir ane lybezerbin abegingen, des god nicht enwolle, so můgin sii daz ungelt abethůn, ob sii wollin, also daz sii danne ere aldin bede widdir gebin sullin alse vore. Gewonnen wir abir lybezerbin so sal diit ungelt blybin stende.
7. Wer oych, daz ymant dyt vorbreche unwißende, von wilchin sachin daz were, der sulde den broch uns vorbu^eßin mid vůnff schilling phennygin unde nicht hoer unde sulde darzu sin ungelt gebin, daz eme geborte, noch deme als vor geschrebin sted.
Diis zu orkunde so han wir lantgrave Herman vorgenant unsir furstlich ingesigel an dysin bryff laßin henckin, der gegebin ist noch Christi gebort drytzenhůndert jar, darnoch in deme vůnffundesebintzigestin jare an dem nestin frytage vor Symonis und Jude der heylgin apostlen.

Sprache des Originaltextes

deutsch

Nachweise

Textgrundlage

Stückangaben, Regest

Küch, Rechtsgeschichte Marburgs 1

Original

Küch, Rechtsgeschichte Marburgs 1

Zitierweise

Landgrafen-Regesten online Nr. 11735 <https://www.lagis-hessen.de/de/subjects/idrec/sn/lgr/id/11735> (Stand: 24.04.2024)