Landesgeschichtliches Informationssystem Hessen

Regesten der Landgrafen von Hessen

1362 August 3

Friedrich von Nürnberg bestätigt den Kauf von Schmalkalden

Regest-Nr. 11585

Überlieferung | Regest | Originaltext | Nachweise | Textgrundlage | Zitierweise
Überlieferung
Drucke: Wenck, Hessische Landesgeschichte 2, UB, S. 414-416 Nr. 398.
Regesten: Wenck, Hessische Landesgeschichte 2, UB, S. 414 Nr. 398.
Regest
Friedrichs Burggrafen zu Nürnberg, und Johanns Landgrafen von Leuchtenberg, als Vormünder der Grafen Heinrich und Berthold von Henneberg, Verspruch an Landgraf Heinrich von Hessen, wegen dem erkauften Teil an Schmalkalden und Scharfenberg.
Originaltext
Wir Friderich von Gots Gnaden Burggrafe zu Nuremberg, und wir Johan von denselben Gnaden Lantgrafe ze dem Leuttenberg bekennen und tun kunt offenlich mit disem Brife fur die Edeln Heinrich und Bertolden Grafen zu Henneberg, unß libe Oheim, der Pfleger und Formunt wir sein, daz der erleuchte Furste Lantgrafe Heinrich von Hessen unß liber Oheim mit ir seligen Mutter und mit in erplich gekauft hat im und dem Hochgeborn Otten Lantgrafen ze Hessen und iren Erben die Slose Smalkalden Haus und Stat, und daz Haus halbe ze Scharffenberg mit alln Eren, Rechten und Nuzen, und mit allen iren Zugehorungen an Kirchenlehen, Manlehen, Manscheften, an Clostern, an Gerichten, an Dorffern, an Welden, an Wazzer, an Weiden, an Holz und an Felde, irsucht und unersucht, wie man daz genennen mag in aller Maz und Rechten, als der Edel selige Albert Burggrafe zu Nuremberg, unß Vetter und Oheim, und Vrowe Soffia sein eliche Wirtin, unß libe mume, inhatten biz uf die Zeit, als unß Oheim von Henneberg selige Muter von iren und unß Oheim der vorgenanten Lantgrafen von Hessen wegen den Kaufe tet; also daz unß egenant Oheim von Henneberg und irer Erben und die egnante unß Oheim Lantgrafe von Hessen und ir Erben Smalkalden Haus und Stat mit dem daz darzu gehort, als vorgeschriben stet, gleich mit einander haben, und an dem Haus Scharffenberg, und daz darzu gehort, sullen unß Oheim von Henneberg und ir Erben haben die drei Teil, wanne ez vor dem Kaufe halb ir waz, und der virde Teil sol unß egnanten Oheim der Lantgrafen von Hessen und ir Erben sein. Auch sullen und wollen unß Oheim beiderseit und ir Erben dieselben Slose und daz darzu gehort, gtreulich schauwern und verteidingen, als ander ir Slose, Lant, Leut und Gut; und sol ir dheiner dem andern an denselben Slosen, Landen und Leuten, und daz darzu gehort, nicht verunrehten, noch dhein Vorteil suchen, sunder sie sullen alle Gefelle, Nuz und Gulde daselbest gleich mit einander ufheben nach dem als vorgescreven und unterschiden ist. Wer auch, daz Kriege ader Ufleuf zwischen unß Oheim beiderseit oder zwischen ir beider Erben erstunde, dez Got nicht verhenge, so sollten die egenante Sloze, und daz darzu gehort, stille sizen, und ir dheiner solde sich wider den andern von oder zu den Slossen nihtes behelfen, noch die Slose und daz darzu gehort in dheine Weys beschedigen. Wer auch, daz unß Oheim von Henberg und ir Erben, oder unß Oheim von Hessen und ir Erben, von nymant anders Not und Krige anstise, darzu sulln die egnante Slose, die Amptleute, Burgman und Burgere daselbest, ir iclichen und ir beider Erben getreulich und mit aller Macht beholfen sein zu allen iren Noten, Krigen und Sachen beiderseit one allerlei Widerrede und one Geverde. Wer auch, daz die egnant slose Bauwes bedorften, den sollten sie und ir beider Erben gleich mit einander tun, und ir einer sol dem andern getreulich darzu beholfen sein. wer auch, daz sie beiderseit ein oder zwenne Amptman sezen daselbst, der oder die sollten in und iren Erben beiderseit geloben und sweren, alle vorgescreven Stucke und Artikel stet und veste zu halden, on geverde. Auch ist geret, wer, daz unß Oheim von Henneberg und ir Erben Not antrefen, daz sie iren Teil on den egnanten Slossen, und daz darzu gehort, versezen oder verkaufen wollten, daz sulln sie und ir Erben unßn vorgnanten Oheim von Hessen und iren Erben ein virteil Jars vor anbiten, und sie darzu lasen kumen; mochten oder wollten sie nicht darzu kumen oder ir Erben, so mugen unß Oheim von Henneberg und ir Erben iren Teil an den Slossen und daz darzu gehort versezen und verkaufen ein andern, also daz der und sie unßn Oheim den vorgnanten von Hessen und iren Erben sulche Gelubde und Verpuntnisse tun, und ir Brife daruber geben gleicher Weis, als sie beiderseit vor getan haben, und dise Brife sagen, on Geverde: dazselbe mugen sie wider tun. Auch ist geret, wer, daz unß Oheim von Henneberg, oder ir Erben, iren Teil an Scharffenberg, den sie da haben und darzu gehort, wollten wider kauffen von den die ez in Pfandesweis von ir beyder inhaben, daz sullen sie und ir Erben unß egenant Oheim von Hessen, und ir Erben, ein virteil Jars vor kunt tun mit iren Brifen und kuntlicher Botschaft, daz sie iren Teil auch daselbest von in losen. Teden sie dez nicht, so mugen sie und ir Erben der egnanten unß Oheim, Lantgrafen von Hessen, Teil mit den iren Teil von denselben losen, als ir Brife sagen, die sie uber scharfenberg haben, also - - - und ir Erben unßn egnanten Oheim und irn Erben sten solln zu einer Losunge irs Teiles an Scharffenberg, daz sie zu irem Teil gelost haben in aller der Maz als Heinrich von Vloyben - - - - von Lanchauwe, Ritter, in beiden zu einer Losung sten sullen mit den egnanten slose, an allerlei Geverde. Alle die vorgescriben Stucke und Artikel und icleichen besunder geloben wir in mit - - - - fur die egnante Heinrich und Bertold Grefen zu Henneberg, unß liebe Oheim, stet und veste zu halden, an allerlei Argelist und Geverde. Dez zu Urkunde geben wir disen Brif besigelt mit unßn und der egnanten Stat Smalkalden Insigeln. Ind wir die Ratmeister und der Rat der Stat zu Smalkalden bekennen, daz uns dieser Kauf wissenlich ist - - - - - - und Artikel. Und haben dez zu Gezeugnusse und durch Bede willen unß egnanten Herren unß Stat Insigel zu den iren an disen Brife gehangen, der geben sit nach Christes Geburt dreuzehenhundert Jar in dem zwei und sehzigesten Jar, an der Mitwochen vor sant Lorenzen Tag.

Sprache des Originaltextes

deutsch

Nachweise

Weitere Personen

Nürnberg, Burggrafen, Friedrich V. · Leuchtenberg, Landgrafen, Johann · Henneberg-Schleusingen, Grafen, Heinrich V. (X.) · Henneberg-Schleusingen, Grafen, Berthold XII. · Hessen, Landgrafen, Heinrich II. · Hessen, Landgrafen, Otto der Schütz · Henneberg-Schleusingen, Grafen, Elisabeth · Nürnberg, Burggrafen, Albrecht der Schöne · Nürnberg, Burggrafen, Sophie, Frau Albrechts des Schönen, geb. Gräfin von Henneberg

Weitere Orte

Schmalkalden · Scharfenberg · Nürnberg, Burggrafen

Sachbegriffe

Vormünder · Städte, Kauf von · Verkäufe · Grafen · Burggrafen · Burgen, Verkauf von · Vorkaufsrechte · Instandhaltungsverpflichtungen

Textgrundlage

Stückangaben, Regest

Wenck, Hessische Landesgeschichte 2, UB

Original

Wenck, Hessische Landesgeschichte 2, UB

Zitierweise
Landgrafen-Regesten online Nr. 11585 <https://www.lagis-hessen.de/de/subjects/idrec/sn/lgr/id/11585> (Stand: 29.03.2024)