Landesgeschichtliches Informationssystem Hessen

Regesten der Landgrafen von Hessen

1395 April 18

Teilung des Gerichts Schönstadt zwischen LG Hermann und Joh. von Fleckenbühl

Regest-Nr. 11454

Überlieferung | Regest | Originaltext | Nachweise | Textgrundlage | Zitierweise
Überlieferung
Ausfertigung: Staatsarchiv Marburg, GR von Fleckenbühl T. Pergament, stark vermodert und mit großen Lücken auf Pappe aufgezogen, alle Siegel ab.
Abschriften: Staatsarchiv Marburg, von 1396 Juli 22, stark vermodert und aufgezogen; Staatsarchiv Marburg, Sh F 85, von 1726; Staatsarchiv Marburg, AR von Fleckenbühl.
Drucke: Kuchenbecker, Analecta 2, S. 252 ff.; Diefenbach, Kreis Marburg, S. 261-264 Nr. 2.
Regesten: Diefenbach, Kreis Marburg, S. 261 Nr. 2.
Regest
Landgraf Hermann von Hessen und Johann von Fleckenbühl urkunden über die Durchführung der Teilung des Gerichtes Schönstadt und gemeinsam auszuübende Rechte.
Originaltext
Wir Herman von gots gnaden lantgrave czu Hessen und ich Iohan von Flegkenboel czu dieser czyt der eldiste bekennen vor uns und unsern erben offenliche an dissem briefe, das wir und unse erben ewiglichen und vortane undereynander halden soln und woln die teilunge und stocgdeilunge des gerichtes zu Schonestad, alse das geteylet, gesteynt und vermalt ist mit denen luden und gudern, ane geverde und begriffe mit artikeln, alse die von worten zu worten hernach geschrieben sten:
Mit namen czu Kulbe, das ist geteilt von den lynden ane biß zu deme zu und da dorch, dy Dytze smedt ynne saß, und oben zu Hantzen Emeln habe tzu und da durch, alse der weg durch den hob ghet, als dy malsteyne ußweißent darobir gesast. Und ist das obirteyl mit deme kirchobe gen der Ybenhard uns Herman von gots gnaden und unsern erben vorgen. gefallen, und daz ander teil mir Iohan von Fleckenboel und mynen erben vorgen.
Item Bernsdorff ist geteilt also, dasz das teyl gen der Ybenharth uns Hermanne von gots gnaden und unsern erben egen. gefallen ist, nach deme, als dy malsteyne darubir gesast uzwysen und die boume sten. So ist das andir deil gen Birgeln mir Johan vorgen. und mynen erben gefallen.
Item ist Reydenhusen geteilt, alse man daz geßchen heryn geit, da Snydewynt ine saß, tzu hern Rottigers hobe czu gein deme Schonestader wege. Da ist das obirteil gein dem borne uns Herman vorgen. und unsern erben gefallen, und das ander teil gen dem Melinborne mir Iohan vorgen. und mynen erben, als die malsteyne ouch uzwysen.
Item Wyderighusen ist geteilt durch Durrenburgis hop czu syme bornepeytchen zu gein der lynden gliche zu, als die malsteyne daz uzwysen. Und ist daz obirteil gein dem walde uns Herman egen. und unsern erben gefallen und ist das andir teil gein Schonestad mir Iohanne vorgen. und mynen erben.
Item Schonestad ist geteilt, alse man von Dampartshusen dy straze heryn geit gein Bornmans hob zu, dy Wyderighuser bach uf, als malsteyne usswisen. Da ist das obirteil mit dem kirchobe mir Iohan vorgen. und mynen erbin gefallen, und daz andir teil gein Fleckenboel uns Hermane von gots gnaden vorgen. und unsern erben.
Item Swarczinborne ist geteilt by deme tyche ane, die gaßin heryn glich sein dem kirchobe by den lynden here, als die malsteyne sten und uzwisen. Und ist datz obirteil mit dem kirchabe uns Hermane egen. und unsen erben gefallen, und datz ander teil gein Schonestad wert mir Iohane megen. und mynen erbin.
Item Dampartshusen ist geteilt, als der weg von Ruschinberg ghet, glych durch das dorff gein Schonestad wert, als dy malsteyne sten und uzwisen. Und ist daz teil gein Beczigindorff wert unß Hermane vorgen. und unsen erben gefallen, und das ander teil gen dem Wolfsdale mir Iohane egen. und mynen erben.
Item Beczingendorff ist geteilt dorch der Dutschin hern hob here, glich durch das dorff, an dem kirchobe her und nedir gein deme Ebirsberge czu, als die malsteyne sten und uzwisen. Und ist daz obirteil mit dem kirchobe mir Iohane vorgen. und mynen erben gefallen, und daz ander teil uns Hermane vorgen. und unsen erben.
Item Byrgeln ist geteilt, als dy mole hie obin sted, uff der bach ane, glich durch daz dorff, als die malsteyne sten und uzwisen. Und ist daz obirteil mit dem kirchobe uns Hermane von gots gnaden megenant und unsern erben gefallen und daz ander teil gein der borg mit Iohan vorgen. und mynen erben.
Item Ramptehusen ist geteilt glich dorch daz dorff, als die malsteyne sten und uzwisen. Ind ist daz teil gein der molen unß Hermane vorgen. und unsen erben gefallen, und das ander teil gein der Hoen Lynden mir Johane vorgen. und mynen erben.
Item sal iglich felt ruren an das andir, nach deme als die malsteine darober gesast sin und uzwisen. Ouch ist geredt, daz alle die kirchobe vorgen., gemeyne weyde, borne, waßere und straßen gemeyne syn soln. Also was uns Hermane von gots gnaden vorgen. und unsen erben daryne, wie vorgeschreben stet, gefallen ist, des mogen sich Iohans von Fleckenboel egen. und siner erben lude midde gebruchen czu allir irer notdorfft ane geverde. Dezselben glichen soln sich unßer, Hermans von gots gnaden itzund genant, und unser erben lude an deme teile, daz Iohann vorgen. und sinen erben gefallen ist, widerume gebruchen; unde sal daz nymand dem andern weren.
Weres ouch sache, daz myn Iohans von Fleckenboel vorgen. Und myner erben lude was czogen uf die kirchobe, dy myne gnedigen junchern egen. und sinen erben gefallen were, oder des vorgen. myns junchern und syner erben lude was czogen uff die kirchobe, die mir Johann itzund genant und mynen erben gefallen weren und sich der gebruchen wulten, so sulden die, die also uff die kirchobe czogen, nymande czu gebodt oder czu dienste sten dan deme, dem sie vor mit der teylunge czugefallen weren. Ouch ome die gademe, huser ader schuren uff dem kirchobe ist geredt, daß iglich in syme gadem blibet sitzen, he sy uns Hermane von gots gnaden vorgen. und unsen erben ader mir Iohanne egen. und mynen erben mit der teilunge vorgefallen, und sal da nymand den andern ane hindern. Ouch ensal der keyner darumme anders ymand dynen oder zu gebode sten, dan deme he czugeteilt were, alse vorgeschreben stet. Ouch soln die egenanten kirchobe mit irme gebuwe iglicher partye lude bliben und gemeyne sin. Und waz uff denselben kirchoben nicht virbuwet were, das al uns beydir partye glich sin.
Wers ouch, daz unß Hermanne von gots gnaden vorgen. und unser erben lude was landis, garten, wesen ader guter hetten uff deme teil, daz Iohane von Fleckenboel und sinen erben egen. Gefallen were, daz czu den hoben von allir gehorte ader itzund ynne hetten, dy unß also gefallen weren, daz sulden die vorgen. unsere lude glichewol arbeyden und gewynnen unde nymande darumme czu dinste ader zu gebode sten, dan weme sie mit der teilunge czugefallen weren. Desselben glichen sulden Iohans von Fleckenboel vorgen. und siner erben lude widderume tun. Ouch soln iglich partye lude zu iren ackern, wesen, garten und gutern faren und wandern mit plugen, wagen und andern in alle der maze, als daz von alter herkomen ist, und sal daz in kein dem andern weren.
Wers ouch, daz uns Hermane vorgen. und unser erben lude waz landis eren oder arbeiden wulden uff deme teile, daz Iohane von Fleckenboel vorgen. und sinen erben czugefallen were, anderst dan vorgerurt ist, one iren willen und inen das verboden were, so sulden sie daz, als digke sie ez teten und verbrechen, den von Fleckenboel vorgen. mit der busse verfallen sin mit namen mit funff schilling phennige, nachdeme als sie inen das verboden hetten. Desselbigen glichen sulden der von Fleckenboel lude vorgenant uns und unsen erbin ouch widerume verfallen syn, als dicke dez noch geschehe, als vorgeschreben stet.
Wers ouch, daz todslege, wonden ader lemnyse geschehen under unsern luden untereinander, daz sulde man bessirn dem, des die lude weren, die also tod geslagen, gewundet ader gelemet waren. Ouch ist gered, teden frembde lude todslege, merderiye ader diberye ader was sache were, der rechte mit irer pyne und mit der stede, die dazu gehoret, sal unser gemeyn sin.
Ouch ist zu allen dissen vorgeschrebenen stucken ußgenommen unser Hermanen von gots gnaden vorgen. und unser erben manlehin, daz der egen. Iohan von Fleckenboel von uns hat und sine aldern von unsern von unsern aldern gehat han an demselben gerichte mit der foydye, die in dem egenanten gerichte gelegen ist.
Dys zu urkunde han wir Herman von gots gnaden lantgrave zu Hessen und ich Iohan von Fleckenboel vorgen. Unser iglich sin sigel vor sich und sine erben an disen brief laßen hengen. Und ich Groppe von Fleckenboel, des vorgen. Iohans son, bekenne, daz disse egen. Stocteilunge und alle sache vorgerurt geschen sye mit mymem wissen und willen und han dez czu geczugnisse myn ingesigel by der vorgen. Myns gnedigen junchern dez lantgraven und myns vaters ingesigele ouch an dissen briff gehangen.
Datum anno domini millesimo trecentesimo nonagesimo quinto in die dominica, qua cantatur Quasimodogeniti.

Sprache des Originaltextes

deutsch

Nachweise

Weitere Personen

Hessen, Landgrafen, Hermann II. · Fleckenbühl, Johann von · Emeln, Hans · Schmidt, Dietrich, aus Kulbe · Rottiger, Herr, Besitzer eines Hofes in Reddehausen · Bornmann, Besitzer eines Hofs in Schönstadt · Fleckenbühl, Groppe von, Sohn des Johann

Weitere Orte

Schönstadt, Gericht · Kulbe, Dorf · Bernsdorf · Birgeln · Eubenhart · Reddehausen, Schönstadter Weg · Reddehausen, Melinborn · Weitrichshausen, Wüstung · Schönstadt · Dampertshausen, Wüstung · Schönstadt, Wyderighauser Bach · Schwarzenborn · Rauschenberg · Betziesdorf · Betziesdorf, Nebelberg · Birgeln, Mühle · Rondehausen, Wüstung · Betzisdorf, Wolfstal

Sachbegriffe

Gerichte, geteilte · Herrschaftsrechte · Weistümer · Grenzweistümer · Flurnamen · Wüstungen · Teiche · Deutschordensherren · Mühlen · Gärten · Mannlehen

Textgrundlage

Stückangaben, Regest

Diefenbach, Kreis Marburg

Original

Diefenbach, Kreis Marburg

Zitierweise
Landgrafen-Regesten online Nr. 11454 <https://www.lagis-hessen.de/de/subjects/idrec/sn/lgr/id/11454> (Stand: 28.03.2024)