Regesten der Landgrafen von Hessen

Erweiterte Suche »
Ergebnismenge »
Treffer 8 von 19

1413 Februar 10

Landgraf Hermann II. kauft Schloß Wildeck

Regest-Nr. 11370

Überlieferung

Drucke:	Wenck, Hessische Landesgeschichte 3, S. 224 f. Nr. 276.
Regesten:	Wenck, Hessische Landesgeschichte 3, S. 224 Nr. 276.

Regest

Abt Johann zu Fulda verkauft dem Landgrafen Hermann von Hessen das Schloß Wildeck mit seinem Zubehör.

Originaltext

Wir Johann von Gots Gnaden Apt des Stiftes zu fulde, und wir Gyse Dechand und ganz Convent desselben Stifts zcu Fulde Bekennen vor uns und aller unser Nachkommen uffintlich In dissem Brieve vor allen Luten, die Ine ansehin Horen adir lesen das wir sampt und besundern In unserem gemeynen Convent bedacht han greisse noitturft und scheddeliche vorburgete Schuld, die wir von unsers Stifts wegen schuldig sin, davor wir und unser Stift verderblich und vergenglich muchten werden und durch groissen noitdurft und schadens willen der uns und unserm Stifte noch entstehin mochte den zcu verwaren und zcu behuten darumb han wir mit ganzem Convent reite einmudiglich mit gutem willen sampt und besundern rechtlich und redelich mit gutem vorraite verkauft und verkauffen In und mit kraft disses Briefs den Hoichgebornnen Fürsten Hern Herman Lantgraven zcu Hessen Hern Ludewigenn Jungen Lantgraven zcu Hessen sinne Sone unsern lieben Herren und Iren erben und wer eyn Fürst des Landes zcu Hessen ist unser Slos Wildegke mit allen Dorfern gerichten gebieten Luten und guten mit Holze Felde wezzen ackern Fischreyen Wasser Weyde mit Wildbanne mit allen Iren Rechten und nutzen besucht und unbesucht, wie man das finden mag, die dazu gehoren und als wir das bißher Ingehabt und besessen han und sunderlich alle unser und unsers Stifts Recht die wir auf den vorgenanten Slosse und gerichten han vor nun Tusent Gulden gut von golde und swerer marg von gewichte, der sie uns Sechs Tusent Gulden geben und bezahlet han, der wir sy qwid, ledig und lois sagen mit dissem unsserm Brieve, und die uberigen dry Tusent gulden han sie uns verburget bestelt und verbrieffet zcu bezcalen uff Zeyte das uns gnuglich ist und herumb seßen wir Apt und Convent vorgnant die egnante unsere Herren die Lanntgraven zcu Hessen Ire erben und Nachkommen an deme Lande zcu Hessen Inn gruwelich erblich were des egenanten unsers Schloßs Wildecke und In alle zcugehorde als vorgerurt ist, und uns und unsern Stifft und nachkommen daruß und behalten uns daran und an den gerichten daselbst keynerley Recht. Und die vorgenanten unser Herren die Lantgraven von Hessen Ire Erben und Nachkommen in deme Lande zu Hessen tun das egnant Slos Wildecke mit aller Zugehorde erblich und ewiglich Innhaben und besitzen glich anders Iren Erbe sloßen und wir und unser Nachkommen an dem Stift zu Fulde soln noch enwoln die egenanten unser Herren die Lantgraven Ire Erben und Nachkommen umb das egnante Sloß und alle sine Zugehorde vorgerurt nimmer ansprechen, noch kheine Forderunge an sie gethun mit Worten oderm it Wergken heymlich adir uffinbar oder werntlich Inn keyner Hande wiese ane alle geverde und ane argelist. Auch han wir Apt Johan, Gyse Dechand und Convent vorgenant uff das egnant Sloß Wildecke und uf alle Zcugehorde vorgerurt vor uns und alle unser Nachkommen und Stift zcu Fulde mit Hande und mit munde rechtlich und redelich verzoegen und verzoihen ewiglich In und mit kraft disses Briefs und han geheissen und heissen Inn diesem Brieve alle Manne und Burgmanne die zcu dem Slosse Wildecke gehoren unsern Herren den Lantgraven von Hessen und Iren Erben nun vor baßmehr und ewiglich gehorsam zcu sin als Iren Erbherren und wir sagen solich Manne und Burgmanne die zcu dem vorgnanten Slosse gehoren aller Eyde und Glubde die sie uns und unserm Stifte und Nachkommen pflichtig sin, queyd ledig und lois, und han sie gewiset und wisen sie alle und Iglichen besundern an die egnante unser Herren die Landgraven Ire Erben und Nachkommen Ire Lehen und Ine zcu empfahen unnd zcu tragen als gewonlich ist, und Ine damit erblich und ewiglich gehorsam zu sin, zcu gewarten und Erbhuldung zu thund als Iren rechten Erbherren zcu dem Slosse Wildecke und wir behalden uns auch an solichen Mannen und Burgmannen, die darczu gehoren von solchs kaufs und erbtrags wegen.
Noch redden wir Apt Johann, Gyse Dechand und Convent vorgnant vor uns unser Nachkommen und Stift die egnanten unser Herrn die Lantgraven und Ire Erben solicher erblichen kaufs an deme Slosse Wildeck mit aller siner zcugehorde vorgeruret zcu werende und rechte Werschaft zcu thund als des Landes gewonheit und Recht ist. Were auch das die egnanten unsere Herren die Lantgraven ader ire Erben zcu rait wurden Brieve oder Confirmationen von solichs erbekaufs wegen erwerben woilten von Bobsten Keysern oder Konigen wes sie darzcu unsre Briefe bedorffen oder hernach bedorffen wurdden, die suln und woln wir Ine geben, wannd sie des anders gesynnen nach aller Irer Begerung und zcu dem Besten als dicke des noit ist one allen Intragk und widdersprache. Auch ensuln noch enwollen wir Apt Johann Gyse Dechandt und Convent vorgnant oder unser Nachkommen nicht vor uns nehmen keinerley Rechte keyne Privilegien noch Woltinde der Rechten, wilchs Namen die genant sin oder noch funden moegen werden, sie sin geistlich oder werntlich darmidde wir dissen Brieff oder sinen Innhald gekrenken, darwidder gesprechen oder gethun mugen In keynerlhand weiß, auch ane alle geverde und ane Argelist. Dieß zcu Urkund han wir Apt Johann, Gyse Dechant und Convent vor gnant unser unsers Stifts und Convents Ingesigel vor uns und alle unser Nachkommen an dissen Brieff gehangen. Datum Anno Domini Millesimo quadringentesimo terdecimo Ipso die beate Scolastice virginis.

Sprache des Originaltextes

deutsch

Nachweise

Textgrundlage

Stückangaben, Regest

Wenck, Hessische Landesgeschichte 3, UB

Original

Wenck, Hessische Landesgeschichte 3, UB

Zitierweise

Landgrafen-Regesten online Nr. 11370 <https://www.lagis-hessen.de/de/subjects/idrec/sn/lgr/id/11370> (Stand: 25.04.2024)