Burgfriede für Schmalkalden und Scharfenberg

Regest-Nr. 8928

Überlieferung | Regest | Originaltext | Nachweise | Textgrundlage | Zitierweise

Überlieferung

Drucke:	Hennebergisches Urkundenbuch 6, S. 180 f Nr. 235.

Regest

Landgraf Ludwig [I.] zu Hessen errichtet mit den Grafen Wilhelm und Heinrich von Henneberg einen Burgfrieden über Schloß und Stadt Schmalkalden und über Schloß Scharfenberg

Originaltext

Wir Ludewig von Gotsgnaden Lantgraue zu Hessen, Bekennen vffintlich in diesem briefe vor vns vnd vnser erbin, daz wir den hochgebornen fursten hern Wilhelme vnd hern Heinriche, Grauen vnd herren zu Hennenberg, vnsern liebin oheimen, vnd jren erbin vnd sie vns vnd vnsern erbin widder eynen rechten Burgfrede zu smalkalden huse vnd Stad vnd zu Scharfenberg in truwen globt vnd zu den heilgen gesworn han, den stede feste zu halten jn allir masze, als hernach geschrebin sted, Also daz der Burgfrede zu smalkalden sal wynden alferre, als die graben, zcune vnd Slege wynden. So sal der Burgfrede zu Scharffenberg wynden zu dem Closter Wyeszenborn, zu der drengke, zu der Molen vnd alfere der hagen, die zcune vnd Slege wenden. Wer es auch, daz dheine geczog würde in den egenanten Burgfreden, da soln wir adir keyne vnser diener adir vndirthane vff beyde syten nicht zu komen zu scheyden, dann mit dem besten. Wer es auch, das vnser eyner des andern fiend wurde, des got nicht wülle, so sullen die egenanten Slosse vnd daz darzu gehortt, stylle siczen vnd vnser keyner dem andern vsz den Slossen adir darjnn dheinen schaden fugen. Auch sal vnser keyner denselbin Slossen vnd daz darzu gehoret, keynen schaden tun noch fugen. Auch sal vnser keyner des andern fiende wyssentlich jnnemen in die vorgenante Slosse. Neme abir vnser eyner vnwyssentlich jnn, der sulte sie zu stundt faren lassen, wann er daz erfure, vnd die sollen auch selng (sic) von dann ryten vor vns. Auch sollen vnser beyder Amptleute der egenanten Slosse, wer die sin, die Burgfrede, als vorgeschrebin stehit, globin vnd sworen zu halten, alsdicke des noid ist. Wann auch die Amptlute von den Amptern komen adir entsatzt werden, so sal man yn forbaszerme nicht verbunden sin von der Burgfrede wegen. Abir die Amptlute, die man an der abgesaczten stad widdir setczet, die soln den Burgfrede globen vnd sweren vnd daczu verbunden gleicherwyes, als die vor yn gewest vnd abegesaczt sin vnd sullen daz vnser iglichs Amptlute tun, alsdicke des noid ist. Wer es auch, das vnser eyner waz kaüffte, das in dem gerichte der egenanten Slosse gelegen were, daz sulte er dem andern zugüte halten vnd jm mit dem halben teyle zu eyner losunge stehin, wann yn des gelustede. Wulte auch vnser eyner sinen teil der Slosse verkoüffen, daz sulte er den andern eyn vierteil jares vor lassen wyssen vnd jm daz dann virkouffen vnd folgen lassen vmb eyn mügelich gelt, als er daz eyme andern virkouffen wulte. Wer es dann, daz es der nicht kouffen wulte, so muchte er daz eyme andern virkouffen, weme er wulte, vnd daran sulte vnser eyner den andern nicht hindern, vnd wer sich zu vnser eyme adir zu vnsern erbin also darjnn kouffte, der adir die sullen zuüornt ane, ehir dann sie darjnn gesaczt werden, mit der andern parthie, die daby blybin, solich Burgfrede globen und sweren vnd die bestellen vnd verbriefen gliecherwyes, als wir vor getan habin vnd als vorgeschrebin sted.
Zu vrkunde diessir vorgeschrebin rede han wir Ludewig, lantgraue zu Hessen vorgenant, vnser jngesigel an diessen brieff lassen hangken von vns vnd vnser erbin. Datum anno domini Millesimo quadringentesimo vicesimo septimo feria quarta proxima ante diem Palmarum.

Sprache des Originaltextes

deutsch

Nachweise

Weitere Personen

Hessen, Landgrafen, Ludwig I. · Henneberg-Schleusingen, Grafen, Wilhelm II. · Henneberg-Schleusingen, Grafen, Heinrich, Sohn Wilhelms I.

Weitere Orte

Scharfenberg, Burg · Schmalkalden, Burg · Schmalkalden, Stadt · Weissenborn, Kloster

Sachbegriffe

Burgfrieden · Burgen · Schlösser · Grafen · Klöster · Burgfrieden, Geltungsbereich von · Flurnamen · Zäune · Amtleute · Gerichte · Verkäufe · Besitz, gemeinschaftlicher · Vorkaufsrechte

Textgrundlage

Stückangaben, Regest

Hennebergisches UB 6

Original

Hennebergisches UB 6

Zitierweise

Landgrafen-Regesten online Nr. 8928 <https://www.lagis-hessen.de/de/subjects/idrec/sn/lgr/id/8928> (Stand: 19.04.2024)